Guwahati BJP candidate in Educational data dik lo thehlut

Assam-a Guwahati (E) BJP candidate, Queen Ojha chu educational qualification data dik lo thehlut nia puh a nih avangin a talbuai hle nia tarlan a ni.

Lok Sabha inthlan awm turah Guwahati (E) a ding tura nomi­nation a thehluhah Queen Ojha hian education data dik lo a thehlut nia tarlan niin, a affidavit thehluhah hian Krishna Kanta Handique State Open University (KKHSOU) aṭangin kum 2011 khan higher secondary pass angin a inziak a, mahse University lam hian higher secondary emaw a tlukpui zirna course an hawng ngai lo tih an sawi thung.

KKHSOU registrar, Dr Amar­jyoti Choudhury chuan an University chuan a hma chuan candidate, HSLC fail-te emaw degree course duhte tan ‘Bachelor Preparatory Programme’ (BPP) an hawng ṭhin tih sawiin, mahse kum hnih kalta khan BPP course hi an titawp tawh tih a sawi.

Media-ten an kawmnaah Ojha chuan kum 35 liamta chhung khan mipuite tan hna a thawk tawh a, politics lam chu a hre tawh hle tih sawiin, affidavit ziah laiin thil dik tawk lo a awm pawh a ni maithei tih sawiin, chhui chian a nih hunah a chiang mai dawn tih a sawi a ni.

Hetihlai hian Congress can­didate Bobbeeta Sharma leh independent candidate, Upa­manyu Hazarika-te chuan hemi chungchang hi Election Commission hnenah an thlen dawn tih an sawi thung. Bobbeeta Sharma chuan hemi chungchang hi Ojha nomination cancel sak theihna a nih leh nih loh chungchangah lawyer-te biak a la tum thu a sawi a ni.