Meghalaya: Poll code palzutah AL hek puh, chhuichiang dawn
Meghalaya Chief Electoral Officer, Frederick Kharkongor chuan Health and Family Welfare Minister, Alexander Laloo Hek-an model code of conduct palzuta puh a nih chungchang chhui chiang tur a ruat thu a sawi.
Media mite tarlan dan chuan Health and Family Welfare Minister hian Nilaini khan Shillong Parliamentary seat-a ding tur BJP candidate, Sanbor Shullai tana campaign nan a official motor a hmang nia puh a ni. West Jaintia Hills District Election Officer (DEO) chuan Sector Officer chu hemi chungchang chhuichiang tur hian a ti niin Kharkongor chuan a sawi a ni.
An puhna hi a dik a nih chuan Election department chuan Hek hnenah show cause notice an pe dawn tih a sawi bawk.
Hetih lai hian Hek chuan an puhna hi a pha thung a, a mimal motor a hman thu a sawi a ni. Mahse social media-a thlalak darh ṭhenkhatah official motor aṭanga Hek a chhuak lai hi hmuh tur a awm thung.
Health and Family Welfare Minister chuan a official motor chu a personal assistant, personal security officer leh a driver-te chuan an hmang tih sawiin, a official driver chu a private motor a khalh tir duh loh thu a sawi a ni.