Congress-in BJP hruaitute leh Assam newspaper 8 lakah FIR thehlut

Congress party chuan Assam chief minister Sarbanada Sonowal, BJP national president JP Nadda, state president Ranjeet Kumar Dass leh Assam newspaper pariat-te lakah BJP advertisement chhuah chungchangah FIR an thehlut.

FIR hi Dispur police station-ah an thehlut a, BJP hruaitute leh chanchinbute chuan Model Code of Conduct (MCC), Representation of People Act, 1951-a Section 126A leh Election Commission of India (ECI)-in kaihhruaina a tihchhuahte an bawhchhia niin APCC Legal department chairman Niran Borah chuan a sawi.

Niran Borah chuan March 27-a Upper Assam-a assembly inthlan thawh khatna neihah khan seat zawng zawng chu BJP in an la vek dawn tih advertisement chhuah chu chanchinbu pariat front page-a dah a ni a, hei hi inthlan thawh hnihna leh thawh thumna la awm tura mipuite rilru hruai kawina tura an ruahman lawk vek a ni, a ti.

BJP advertisement tihchhuah hi Representation of Peopla Act, 1951-a section 126A bawhchhiatna lian tak a ni a, kum hnih lungin tan leh pawisa chawitir thlenga hrem theih an ni, a ti. Hei bakah hian ECI chuan Assam inthlan tur atana kaihhruaina a tihchhuahah, March 27 zing dar 7 aṭanga April 29 zan dar 7.30 thleng poll result kaihhnawih chu print leh electronic media-ah tihchhuah a khap bawk a ni.

Borah chuan, inthlan thawh khatna neih tuk, Pathiannia BJP-in chanchinbu-a dik lo taka inthlan result tur an tihchhuah chungchangah Assam chief electoral officer Nitin Khade hnenah pawh complaint an thehlut nghal tih sawiin, BJP leh advertisement chhuahtu chanchinbute chungah rang taka action la tura an phut thu a sawi.

CEO office chuan hemi chungchang hi ECI-in a enfiah tur thu a sawi. BJP advertisement tichhuaktute hi The Assam Tribune, Asomiya Pratidin, Amar Asom, Niyomia Barta, Asomiya Khabar, Dainik Asam, Dainik Jugasankha leh Dainik Purvodaya chanchinbute an ni.