NIA-in Manipur independence puangtu Imphal-ah hruai

National Investigation Agency (NIA) team chuan India lak aṭanga Manipur independence puang a, United Kingdom (UK)-a 'goverment in exile' dintu mi pahnih zinga pakhat, Narengbam Samarjit Singh an man chu Thawhṭanni khan Imphal-ah an hruai thleng.

Kum 2019, October thla khan Samarjit leh Yambem Biren chuan UK-ah Manipur independence puangin 'government in exile' Manipur State Council an din a, an sorkar dinah hian Samarjit hi minister of external affairs a ni.

Manipur State Council din chungchang hi NIA chuan chhuiin, hemi thila inhnamhnawih Sarmajit leh Biren bakah mi dang pathumte lakah hian Imphal-a NIA special court-ah Indian Penal Code (IPC) leh Unlawful Activities (Prevention) Act (UAPA) section hrang hrang hnuaiah charge sheet a thehlut a ni.

NIA chuan Sarmarjit Singh leh a thurualpuite hi dik lo taka sum lalutah puhin, Salai Group of Companies leh SMART society-a sum deposit-te chu kumtin a pung 36% a pek an tiam a, mipuite bumin an sum dahte chu an lo neihsak ṭhin niin a tarlang.