Union budget-ah Hmarchhak tana sum dah a pung

Union finance minister Nirmala Sitharaman-i'n kar liam ta Inrinni-a union budget 2020 a pharhah, hmarchhak state-te tana sum dah chu tihpun a ni.

 

2019-2020 union budget-ah khan hmarchhak state-te tan cheng vaibelchhe 53,374 dah a ni a, budget tharah erawh sum dah hi 10% zeta pungin, cheng vaibelchhe 60,112 dah a ni. 

Sorkar laipuia ministry pariatte chuan hmarchhak bial tan fund hran an dah bawk a, a bikin tourism, agriculture leh allied sector bakah transport leh communication lam dah pawimawh a ni bawk. 

North Eastern Council (NEC) tan cheng vaibelchhe 885 dah a ni bawk a, budget hmasaah khan cheng vaibelchhe 869 dah a ni.

Budget thara hmarchhak bial kaihhnawih tarlan ṭhen­khat zingah hmarchhaka archaeo­logical site panga-te iconic site tihchangtlunna tur te, natu­ral gas grid km 16,200 chu km 27,000-a tihpunna tur te a tel. He grid tihlen tur hian hmarchhak bialah hna tam zawk a siam phah dawn a, hei hian economy lamah pawh nghawng ṭha tak a nei dawn niin official-te chuan an sawi. Hei bakah hian Ministry of Civil Aviation-in international leh national route-a Krishi Udan scheme a kalpui tur chu hmarchhak state leh tribal district-a farm & agricultural products hralhchhuahna kawngah puiin, an thil tharchhuah hlutna pawh a pun phah dawn bawk a ni.