Manipur-ah Prime Minister Modi Congress in infiammi te tan engmah ti lo: PM

Prime Minister Naren­dra Modi chuan Pathianni khan Manipur tlawhin Lok Sabha inthlan awm tur atan a campaign. Congress chu na taka beiin Manipur-a kum 15 an sorkar chhung khan mipuite tan, a bik takin infiammi te tan engmah an ti lo tih a sawi.

Hapta Kangjeibung-a thu a sawinaah Narendra Modi chuan infiammi Mary Kom, Bombayla Devi leh midang tam tak chuan India tan inchhuanna tur thil an lo ti tawh ṭhin tih sawiin, mahse Congress chuan heng mite tan hian engmah an ti lo tih a sawi a ni.

Modi chuan a vawikhat nan pro-incumbency factor a awm tih sawiin a kaihhruai Bharatiya Janata Party chuan state zawng zawngah hnehna an chang dawn tih a sawi. BJP kaihhruai sorkarin Manipur-ah sorkarna an siam hnuah economic blockcade pawh hmanlai thilah a chang ta tih sawiin tharum thawhna pawh a tlem tawh hle tih a sawi bawk. Hetihlai hian Modi hian Citizenship Bill chungchang engmah a sawilang duh lo thung.

Congress chu national se­curity rinhlelh tir tuma puhin Modi chuan February-a Central Reserve Police Force (CRPF) 40, Pulwama-a thah an nih hnu khan a vawikhat nan India chuan Pakistan hnenah Balakot strike hmangin chhanna chiang tak an pe tih a sawi. Heti chung hian Congress chuan finfiahna an la phut a ni, a ti.

PM Modi chuan a vawikhat nan Manipur ṭhalai 100,000 hnenah loan pek a nih thu sawiin heng zinga 4000 hi hmeichhia an nih thu a sawi a, miretheite hnenah medical treatment atana cheng nuai nga pek theihna scheme chungchang pawh a sawilang bawk.

Manipur-a chhungkaw nuai khat hnenah a thlawna gas connection pek a nih thu sawiin Congress pawh khan heng scheme te hi an ti ve thei reng a, mahse an ti duh lo niin a sawi a ni.

Prime Minister Modi hian Tripura a tlawh hnuah IAF thlawhtheihna hmangin Manipur hi a tlawh leh a ni. PM kal tur duh lo hian hel pawl ṭhenkhat chuan nawrh an huaihawt a, nunphung pawh a khaihlak hle a ni. Hemi avang hian PM thusawi ngaithla pawh hi an tam lo hle nia tarlan a ni bawk.

Police-te chuan buaina chhuak erawh a awm lo niin an sawi.