Himanta-an Citizenship Bill Issue tling lo a nih thu sawi

Assam Finance Minister leh hmarchhak BJP hruaitu Himanta Biswa Sarma chuan Citizenship Amendment Bill chu issue tling lo a nih thu sawiin hmarchhak mipuite chuan national issue an ngaipawimawh zawk a ni, a ti.

Himanta Biswa Sarma chuan issue pawimawh zawk Pulwama attack, Jammu and Kashmir, Ujjwala Yojana leh Aaro­gya Yojana-te chu voter-te chuan an ngaipawimawh zawk tih a sawi.

North East Demo­cratic Alliance (NEDA)-a an thawhpui ṭhenkhat ten CAB chungchang avanga an thlauhthlak chungchanga zawhna chhangin Biswa Sarma chuan seat ṭhenkhat, Congress an chak vak lohnaah chuan an thu­rualpuite nen chuan inkhing dawn mah se, seat tam zawkah chuan inthurualin Congress chu an bei dawn tih a sawi.

Congress hruaitu hlun tak ni ṭhin, 2015-a BJP zawm ta Himanta chuan Congress chu an hneh dawn tih sawiin Assam-ah ringawt pawh seat 10 chuang leh hmarchhakah seat 20 chuang an lak dawn thu a sawi bawk.

Assam chief minister Sarbananda Sonowal pawhin Congress chu eirukna nena inzawm tlat party an ni tih sawiin BJP lakah chuan chance an neih loh thu a sawi. Kum nga chhung lekin Modi chuan Assam chu national agenda-ah vawrh hmanin hmasawnna an neih theih nan nasa takin a pui tih a sawi a ni.