Manipur-ah SDFM in Congress thlawp dawn

Manipur-a Secular Demo­cratic Front Manipur (SDFM) chuan BJP manifesto-a Citi­zenship (Amendment) Bill a telh an duh loh zia lantirin Lok Sabha inthlan an hmachhawn turah Congress candidate an thlawp dawn tih an sawi.

SDFM-ah hian political party pariat an infinkhawm a ni.

SDFM convenor Th Inaocha chuan BJP chu communal party an nih thu sawiin, Manipur leh hmarchhaka-a ram leilung fate chu an election manifesto-a Citizenship Amendment Bill an telh leh hmang hian nuai bo an tum a ni, a ti.

BJP chu hmarchhak ram neitu culture leh nihphungte tihchhiat tumah a puh a, hmar­chhakah chuan an tla na lo hle tih a sawi bawk.

Samajwadi Party (SP) office, Imphal-a news conference an neihnaah SDFM convenor chuan BJP chuan thuneihna an chang leh a nih chuan CAB chu an tharthawh leh dawn tih a sawi. CAB hmang hian Manipur leh hmarchhak ram leilung fate chu nuaibo an ni dawn a ni, a ti.

SDFM hi party pariat- Aadmi Admi Party (AAP), Rashtriya Janhit Sangharsh Party (RJSP), Nationalist Congress Party (NCP), Manipur People’s Council (MPC), Janata Dal (S), Trinamool Congress (TC), Democratic Bharatiya Samaj Party (DBSP) leh Samajwadi Party (SP) infinkhawm ten an din a ni.

Inaocha chuan Congress candidate an thlawp chhan ber tur chu BJP in thuneihna an chan leh tur an dan theih dawn vang a ni, a ti bawk.

SDFM convenor chuan Congress in an agenda 22 a pawmpui avangin Congress chu thlawp an remti tih sawiin, Congress chuan CAB dodal chu an tiam tih a sawi a ni.

Inner Manipur Parlia­mentary Constituency Congress candidate, O Nabakishore chuan BJP in Manipur-a hneh­na an chang a nih chuan CAB dana chantir a nih theihna turin mipuite chuan phalna an pe a nih dawn thu a sawi. BJP chuan hmarchhak mipuite chu thu chauhin an ngaina a, a takah chuan an ngaina lo tih a sawi a, mipuite chu vote hmuh nan bum an tum mai a ni, a ti bawk.