Modi rally aṭanga mipui kal darh loh nan Manipur Minister leh police-ten gate khar

Prime Minister Narendra Modi chuan Pathianni khan Manipur tlawhin an party tan Imphal-a Hapta Kangjeibung-ah rally neiin a campaign a, a rally tur hi a thlen tlai avangin, rei tak nghah a ngai a ni.

Mipui-ten rally an chhim ngei hi an duh avangin Chief Minister N. Biren Singh leh minister-te bakah police-te chuan thiam takin hma an la nia tarlan niin, mipuiin rei tak an nghah hnu pawha an haw darh lohna turin police-te hian gate-te an khar hial.

Hetichung hian mipui sing chuan gate-te hi an lawnliam a, gate lawnliam zingah hian hmeichhia pawh an tel bawk. Mipuiin rally-na hmun chhuahsan tuma gate-a an lawnliam lai video hi social media-ah a darh bawk niin Manipur media-te chuan an tarlang.

Media report in an tarlan dan chuan Manipur rural deve­lopment & panchayati raj minister Thongam Biswajit Singh pawhin mipuite chu haw lo tur leh PM Modi thusawi chu ngaithla turin nasa takin a ngen a ni. News Central chuan hmeichhiate leh zirlaite chuan rei tak an nghah hnu pawha PM a thlen theih loh avang hian rally-na hmuh hi an chhuahsan ṭan a, hei hi BJP member ten Minister hnena an hrilh hnu hian Minister hian kalsawn lo tur hian a ngen ta niin an tarlang.

Biswajit Singh hian minute 10 chiah nghak tura a ngen thu te pawh a sawi nia tarlan niin, music play mai tur a ni nge ti ten a zawt hial a ni. Hemi a nih avang hian music-te chu play mah se PM chu a la thlen lawk loh avangin mipuite-te chuan kalsawn an tum tho a ni.

Chief Minister N Biren Singh pawhin a thusawinaah PM chu hmarchhak hmundangah rally a neih vanga tlai a nih thu te leh mipuite chu nghak hram tura a ngen thu te tarlan a ni bawk.

PM Modi hian Manipur a tlawh hma hian Tripura leh West Bengal-te a tlawh phawt a ni.

Manipur Talks in video an post aṭanga a lan danin police-te chuan mipui chhuah tumte chu an dang a, social media-a video darhah pawh hmeichhe pahnih gate-a an lawnliam lai hmuh tur a awm bawk.

Report ṭhenkhatin an tarlan dan chuan mipui chhuah tum an tam em avang hian a hnu deuhah phei chuan police-te hian gate hi an hawng leh a ni.