Kuminah NE state paliin RS member thlang dawn

Kuminah hian hmarchhak state zinga pali - Mizoram, Meghalaya, Manipur leh Arunachal Pradesh-te chuan Rajya Sabha member thar an thlang dawn. 

Rajya Sabha member zinga 69 chu kumin hian an term a tawp dawn a, term tawp tur zingah hian BJP MP 18 leh Congress MP 17 an tel. Rajya Sabha Secretariat chuan Parliament Upper House-ah hian seat li a ruah mek thu leh, member 69 term a tawp tur thu a sawi a, seat luahkhat ngai zat tur hi 73 a tling dawn a ni. 

Member 250 awmna, Rajya Sabha-ah hian BJP-in member 83 nei mekin Congress-in member 46 a nei mek bawk. MP chawl tur hi Uttar Pradesh state-ah an tam ber a, member 10 an awm. Maharashtra-ah member pasarih, Tamil Nadu-ah paruk, West Bengal leh Bihar-ah panga ve ve an chawl tawh dawn bawk.