Manipur sorkarin Myanmar raltlan chungchanga A thupek tihchhuah tawh a sut leh

Manipur sorkar chuan Myanmar raltlante lo hnar zel tura thupek a tihchhuah chu sawiselna nasa tak a tawh hnuah a sut leh.

March 26 khan state home department chuan border district, Chandel, Kamjong, Ukhrul, Tengnoupal leh Churachandpur deputy commissioner-te hnenah Myanmar aṭanga raltlan luh tumte chu lo hnar zel turin a hriattir a, hei bakah hian Aadhar enrolment kalpui mek pawh titawp a, hmanruate pawh hmun him lamah dah ṭha vek turin a lo hriattir tawh a ni.

Mahse Myanmar tualchhung buaina thleng mek a, sipaite hlaua tlanchhiate lo hnar tura Manipur sorkar thupek tihchhuah hian sawisel a hlawh hle a, hei vang hian Thawhlehni khan he thupek hi sorkar chuan a sut leh a ni.

Special home secretary H Gyan Prakash chuan raltlan luh phal lo tura thupek tihchhuah tawh hi sut a nih thu sawiin, state sorkar chuan mi mangangte chhawmdawl turin theihtawp a chhuah a ni tiin, Imphal-ah Myanmar aṭanga raltlan pathumte pawh enkawl mek an nih thu a sawi.