Rahul Gandhi-a'n Assam zin tur ṭhulh

Congress party hruaitu, Rahul Gandhi chu Assam-ah Thawhlehni khan campaign tura zin a tum a, mahse ruahsur nasat vangin a zin tur hi a ṭhulh.

Thawhlehni khan Silchar-a Indi Club Ground-ah Rahul Gandhi hi party worker hmeichhiate nena inkawmna hun hman tur a nih bakah, Haflong leh Karbing Anglong-a public meeting-a thu sawi tur a ni. Mahse ruah a sur nasat avangin a kal thei ta lo a ni.

Gandhi chuan campaign tura a kal theih tak loh avangin video message thawnin, Assam mipuite chu Congress kaihhruai ṭangrual pawl, Mahajot chu vote turin a sawm a, Assam-ah hmasawnna nasa tak a thlenpui dawn tih a sawi.

Video message-ah hian Gandhi chuan Citizenship Amendment Act (CAA) chungchang pawh sawichhuakin, BJP sorkarin a pass he Act hi Assam culture, language leh history beihna a ni tiin, Congress chuan he dan hi hman a remti ve ngai dawn lo tih a sawi a ni.

Congress party-in an party manifesto-a Assam mipuite tana thil tiam panga an neihte chu sorkarna an siam a nih chuan an tipuitling ngei dawn tih Rahul Gandhi chuan a sawi. An thil tiam zingah CAA kalpui loh hi a tel a, hei bakah hian kum nga chhunga sorkar hna nuai nga siamte, tea garden worker minimum wage tihpun te, thla tin electricty unit 200 chin a thlawna pek te leh, chhungkaw nu ber hnena thla tin Rs 2,000 pekte a tel.