NRC list-a tel lote rejection slip pe turin Assam sorkar ngen

Sorkar laipui chuan Assam sorkar hnenah kum 2019-a National Register of Citizens (NRC) final list a tihchhuaha tel lote hnenah 'rejection slip' pe chhuak vek turin a ngen.

NRC final list-ah hian dilna thehluttu mi vaibelchhe 3.29 zinga nuai 19 chuang telh an ni ve lo a ni. He list hi kum nga chhung buaipui a nih hnuah kum 2019 khan tihchhuah a ni a, NRC buaipuina atan hian cheng vaibelchhe 1,220 zet an seng a ni.

Ministry of Home Affairs (MHA) hnuaia Registrar General of India (RGI) chuan Supreme Court thupek angin Assam sorkar chuan list-a tel leh tel lo, supplementary list a tichhuak tawh a, mahse he list-a tel lote hnena rejection slip erawh a la pe chhuak lo tih a sawi.

MHA chuan NRC list a telh an nih loh vangin 'foreigner' a puan nghal ngawt theih an ni lo tih sawiin, Foreigners Tribunal (FT) ah an appeal thei a ni, a ti. FT-a appeal theih hun atana hun bituk pawh ni 60 aṭangin ni 120-ah pawhsei a ni tawh bawk.

Assam state chauh hi India rama NRC kalpuina la awmchhun a ni a, kum 1985-a sorkar laipui, All Assam Students' Union (AASU) leh All Assam Gana Sangram Parishad (AAGSP) ten Assam Accord an ziaha an state-a foreigner awmte dapchhuah a, thawn haw an nihna tura inremna an lo siam tawh bawhzuiin hmalakna hi kalpui a ni.