Hmarchhak state tinah Lok Sabha inthlan thawh khatna nei dawn Arunachal leh Sikkim-ah Assembly inthlan nei dawn bawk

Vawiin hian Lok Sabha inthlan thawh khatna chu ramchhung hmun hrang hrangah neih a ni dawn a, hmarchhak state zawng zawngte chu a thawhkhatnaah hian an inthlang vek dawn a ni. Assam-ah hian inthlan hi thawh hnihna neih la ni dawn a, state dang zawngah erawh chuan thawh khatnaah hian inthlan hi zawh fel nghal vek a ni ang.

Arunachal Pradesh:

Arunachal Pradesh hian Lok Sabha inthlan leh state Assembly inthlan an hmachhawn rual dawn a, boruak pawh a sang hle. Lok Sabha seat pahnih an neih bakah Assembly seat 60 an nei a ni.

Arunachal West Parliamentary seat: Union minister of state for Home, Kiren Rijiju chu he bialah hian a ding dawn a, Congress lam hian Chief Minister hlui Nabam Tuki an thehchhuak dawn thung a ni. Anni pahnih inkhing tur hian boruak a nei lian hle a, Kiren Rijiju hi Union Minister ni phak a nih bawk avangin Congress lam tan hi chuan a huphurhawm hle tura ngaih a ni. Conrad Sangma kaihhruai NPP chuan candidate an siam bawk.

Arunachal East Parliamentary seat: Congress hian Home Minister hlui james Lowangcha Wanglat an thehchhuak a, a ni hian MP nilai Ninong Ering chu a thlak dawn a ni. BJP lam hian state unit president Tapir Gao an thehchhuah bawk avangin anni pahnih inkhing tur hian boruak a siam hle. People's Party of Arunachal (PPA) pawhin candidate an nei ve bawk.

NPP erawh chuan candidate siam hran loin BJP an thlawp dawn thung. JD(S) pawhin candidate an nei bawk a ni.

State Assembly:

Seat 60 awmna Arunachal Pradesh hian vawiin hian state Assembly inthlan pawh an hmachhawn nghal dawn a, BJP chuan seat awm zawng zawngah hian candidate an dah vek a ni. Congress chuan candidate 46 an nei thung. NPP pawhin candidate eng emaw zat nei bawkin, JD(S) leh party eng emaw zat in candidate an siam.

Candidate awm zawng zawng hi 180 niin, heng zingah hian hmeichhia 11 an awm a ni. NPP hian seat 27-ah BJP an thlawp dawn tih an sawi tawh bawk. NPP hian Arunachal Pradesh-ah hian hma an sawn hle a ni. Tun ṭum inthlanah hian mipa aiin hmeichhe voter an tam zawk nia tarlan a ni bawk.

Manipur:

Lok Sabha seat hnih awmna Manipur-ah hian, seat pakhat zawk, Outer Manipur (reserved) seat-ah vawiin hian inthlanna neih a ni dawn a, Inner Manipur-ah chuan April 18 hian an inthlang dawn thung.

Outer Manipur ST tana reserve seat-ah hian candidate pariat inkhing tur an awm a, BJPcandi dateHoulim Shokhopao, Benjamin Mate tia koh bawk te, Congress candidate K James, NCP candidate Angam Karoung Kom, National People's Party aiawh Thangminlien Kipgen leh Naga Peoples Front aiawh Lorho S Pfoze-te chu hming langsar an ni.

Meghalaya :

Meghalaya pawh hian seat pahnih neiin Shillong seat leh Tura seat-ah ṭhenhran a ni a, heng seat pahnihah hian vawiin hian inthlanna an nei ve ve ang. Selsella assembly seat-ah bye-election a awm nghal dawn bawk a, hetah hian candidate pali inkhing tur an awm thung.

Shillong parliamentary seat: Candidate paruk inkhing tur awmin, Congress candidate Vincent Pala leh sorkarna siam mek Meghalaya Democratic Alliance ṭangrual pawlin an thehchhuah United Democratic Party mi Jemino Mawthoh-te chu boruak nei lian an ni. Hetih lai hian BJP chuan candidate hran siamin Sanbor Shullai chu an thehchhuah ve bawk.

Tura parliamentary seat: MDA aiawhin NPP chuan buk rit tak tur Agatha Sangma an vawrhchhuak a, hnehna chan ngei an tum ruh hle. Congress hian chief minister hlui Mukul Sangma chu thehchhuah ve bawkin BJP chuan Rikman G Momin an thehchhuak thung. He bial hi bial ngaihnawm tura rin a ni.

Nagaland :

Nagaland hian Lok Sabha seat khat neiin Aonglenden Assembly constituency-ah bye-election vawiin hian an nei nghal dawn bawk.

Nagaland-ah pawh hian state dang ang bawkin NDA-a BJP thawhpui NDPP leh Congress chu thawm nei lian an ni. Congress hian K L Chishi an dintir a, sitting MP leh NDPP member Tokheho Yepthomi chuan thawm a nei lian hle bawk.

NPP chuan Hayithung Tungoe an thehchhuak a, Independent candidate pakhat a awm bawk. NDPP hi BJP chuan an thlawp dawn thu an sawi a ni.

Sikkim :

Lok Sabha inthlan leh State Assembly inthlan an hmachhawn rual dawn a ni. Sikkim hian Lok Sabha seat pakhat neiih Assembly seat 32 an nei thung.

BJP chuan Shri LatenTshering Sherpa an thehchhuak a, INC aiawhin Bharat Basnett chu a din dawn bawk. SDF candidate atan Dek Bahadur Katwal thehchhuah niin SKM candidate Indra Hang Subba chuan thawm a nei lian bawk. Sikkim-ah regional party-te thawm hi a lian hle a ni.

State Assembly: Rorellai leh kum 20 chuang zet sorkarna siam tawh Chief Minister Pawan Chamling kaihhruai SKM chuan thawm an nei lian hle a, footballer hlui Bhaichung Bhutia kaihhruai SDF pawh tun ṭumah hian an lian hle tura ngaih a ni bawk.

Tripura :

Tripura-ah hian Lok Sabha seat hnih awmin vawiin hian Tripura West parilamentary seat-ah inthlan neih a ni ang. Tripura East-ah erawh a thawh hnihnaah inthlanna an nei dawn thung.

BJP candidate chu Rebati Tripura a ni a, Congress lam hian state BJP vice president hlui Subal Bhowmick chu an thehchhuak thung.

CPI(M) lamin Sankar Prasad Datta an dintir a, Trinamool Congress aiawhin Maman Khan a ding bawk. Tripura West candidate-te hi thawm nei lian tak tak vek an ni.