Hmarchhak hmun hrang hrangah inthlanna neih a ni Hmun ṭhenkhatah EVM chiang lo report awm

Nimin khan ramchhung hmun hrang hrangah Lok Sabha inthlan thawh khatna neih niin, hmarchhak state tinah inthlanna hi neih a ni a, report kimchang hriat hman ni lo mah se vote a tla ṭha thawkhat niin state hrang hrang media-te chuan an tarlang.

Nimin tlai dar li vel thleng khan Tripura-ah chuan vote tla hi 63% a tling tawh niin media ṭhenkhat chuan an tarlang a, Tripura-ah hian mi tam tak beisei aiin vote a tla ṭha a ni. He thu ziah lai thleng hian Naga­land-ah chuan vote 73% a tla hman a, Manipur-ah 55.44% tla hmanin Assam-ah 44% a tla bawk. Arunachal Pradesh-ah pawh 54 % a tla hman a ni.

Hetih lai hian Assam hmun ṭhenkhatah chuan EVM chiang lo report a awm a, hemi vang hian vote thlak pawh a khaihlak phah hle nia tarlan a ni. Buaina lian tham chhuak erawh report a awm lo thung.

Meghalaya-ah chuan dar nga thleng khan vote 75% a tlak hman thu Firstpost chuan an report thung. Sikkim-ah erawh chuan he thu ziah lai hian vote hi 34% a tla hman a ni.

Hmarchhakah hian Lok Sabha constituency 25 a awm a, Assam in seat ngah berin seat 14 an nei a ni. Arunachal Pradesh, Manipur, Meghalaya leh Tripura chuan seat hnih ṭheuh an nei a, Mizoram, Nagaland leh Sikkim chuan seat khat ṭheuh an nei bawk.

Hmarchhak inthlan bik hi chu a thawh thumnaah a zo hman vek dawn a, Mizoram, Nagaland leh Meghala­ya-ah hian assembly seat pakhat ṭheuh­ah bye-election neih nghal a ni a, Arunachal Pradesh leh Sikkim chuan state assembly inthlan an hmachhawn nghal bawk.

Arunachal Pradesh-ah hian assem­bly seat 60 a awm a, BJP chu party lian ber niin seat zawng zawngah hian nomi­nation an file a, Congress chuan seat 46-ah nomination an file thung. NPP pawhin seat eng emaw zatah no­mination file bawkin seat 26-ah chuan BJP an thlawp dawn tih an sawi.

Sikkim pawhin assembly inthlan hmachhawn bawkin seat 32 an nei a, regional party pahnih- SKM leh SDF-te chu boruak nei lian an ni thung.

Inthlan report kimchang hi he thu ziah lai hriat hman a ni lo a ni.