PM Modi-an Assam a tlawh Citizenship Bill pawm tiam

Prime Minister Narendra Modi chuan Ningani khan Assam tlawhin Lok Sabha inthlan atana campaign in, hmun hniha rally-ah thu a sawi.

Mangaldai Parliamentary consti­tuency hnuaia Kamalpur-a thu a sawinaah Narendra Modi chuan national security leh firfiakte beihna chungchangah in rinhlelhna a awm thei dawn em ni tia zawhna siamin eptu lam chuan national security tihchhiat an tum niin a sawi a ni.

Modi chuan, "Kan sipaite chuan an chakna an tilang a, mahse Congress chuan finfiahna an phut a ni", tia sawiin Congress a bei zui bawk. Hemi hnu hian Silchar-ah rally neih chhunzawmin thu a sawi leh bawk. Modi chuan Congress beih chhun­zawmin Independence hunlaia ram ṭhenhran a nih lai khan Pakistan-a awm minority-te an ngaihtuah lo tih a sawi.

Pakistan-ah kan fanu ten tihduh­dahna an tuar mek a ni, tia sawiin triple talaq bill pawh an sorkar chuan chak taka pawm ngei an tum tih a sawi. Congress, AIUDF leh eptu party dangte pawhin triple talaq bill titawp tur hian theihtawp chhuah mah se an dang thei dawn lo tih sawiin, kan fanute hian dikna an hmu dawn a ni, a ti.

Lok Sabha inthlan kal mek chung­chang pawh sawiin an party chuan boruak an nei ṭha hle tih thu a dawng tih a sawi. Mipuite chuan an duh an thlang fel tawh a, eptu lam tan chuan hnehna chan a har tawh dawn hle a ni, a ti bawk. Modi chuan Assam-a Lok Sabha inthlan thawh khatna neihna seat pangaah chuan BJP in hnehna an chang vek dawn niin a sawi.

Citizenship Amendment Bill kan pawm ang!

Silchar-a rally-naa thu a sawinaah Prime Minister Narendra Modi chuan Lok Sabha inthlan kal meka NDA in hnehna an chang leh a nih phawt chuan BJP chuan Citizenship (Amendment) Bill pawm an tiam tih a sawi.

Modi chuan society-a section zawng zawngte rawn an nih hunah bill chu siamṭhat a ni dawn tih sawiin, Assam community-te himna chu an ngaih­pawimawh dawn thu a sawi. Assam ṭawng, culture leh nihphungte chu humhim tiamin Bill ngaihtuah a nih leh hunah pawh hemi chungchang hi ngaihtuah tel a ni dawn tih a sawi bawk.

Citizenship Amendment Bill hi kumin January 8 khan Lok Sabha-a Modi sorkar hian an pawm a, mahse Rajya Sabha-ah pharh a ni ta lo a ni. Congress chu beih chhunzawmin "Fundamentalist-te chuan Pakistan-ah kan unaute an tiduhdah a ni", tia sawiin hemi chungchangah hian Congress chu mawhphurtu an ni lawm ni? tiin zawhna a siam.

Bangladesh leh Pakistan-a cheng mandir leh gurudwara-a kal ṭhinte chu India-ah an lo kal a ngai a ni, tia sawiin, Congress thil tihsual vangin an ram ngeiah ramdang mi nihna an nei tih a sawi bawk.