Inthlan ni-a PM in Assam a tlawh hi MCC bawhchhiatna a ni: Tarun Gogoi

Assam Chief Minister hlui leh Congress hruaitu hlun Tarun Gogoi chuan Nilaini-a Prime Minister Narendra Modi-an Assam a tlawh chu na takin a sawisel.

Tarun Gogoi chuan inthlan ni taka PM Modi-an Assam a tlawh chu model code of conduct bawh­chhiatna a ni tih sawiin, constituency pangaa inthlan­na kalpui a nih mek laia state a tlawh chu MCC bawhchhiatna diktak a ni tih a sawi.

Jorhat-a DCB Girls High School polling station-a vote a thlaknaa media miten an kawmnaah he thu hi sawiin Gogoi chuan Modi chu a duh chuan inthlan tukah pawh a campaign thei reng tih a sawi. Assam martar-te hming hmanga vote zawn pawh chu MCC bawhchhiatna a nih thu leh martar-te chu BJP ta ni loin an ta a nih zawk thu a sawi a ni.

Gogoi chuan media mite zawhna chhangin BJP chu an mangang hle tih a sawi a, chutiang ni lo se chu PM Modi pawh vawi eng emaw zat a rawn campaign a ngai lo ang, a ti. Modi chuan 'chowkidar' a inti a, mahse eng vangin nge ram pawisa laksaktute pawisa chu a laklet theih loh tia sawiin BJP chuan ‘acche din’(ni duhawm) chauh an sawi a, keini chuan hmasawnna leh changkanna kan duh a ni, a ti.

Tarun Gogoi hian a fapa Gaurav Gogoi dinna bial, Koliabor parliamentary constituency-ah vote a thlak a, mipui zingah a intlar ve a ni.