Assam election 2021 : BJP candidate nupui motor-ah EVM phur

Assam-ah assembly inthlan thawh hnihna chu April 1, Ningani khan neih a ni. Inthlan thawh hnihna hi district 13 chhunga constituency 39-ah neih a ni a, vote 74.76% a tla a ni.

Inthlan thawh hnihna atana vote thlak zawh hnu, Ningani zan khan Karimjang-ah vote thlakna, electronic voting machine (EVM) pakhat chu BJP candidate, Krishnendu Paul-a nupui car-ah hmuh a ni. Eptu party lamten hei hi nasa taka sawiselin, rorellai BJP chu vote tihchingpen tumah an puh.

He thil thleng hi Election Commission of India-in a hriat veleh, he EVM hmanna, Ratabari bialah vote thlak ṭha turin nimin khan thupek a tichhuak nghal a ni. BJP candidate car hmang hian EVM hi Pawtharkandi Vidhan Sabha-a strong room panpui a ni a, mahse he motor hi Election Commission motor a nih loh avangin mipuiten an ringhlel a, lo dangin an bei zui a ni.

Karimganj deputy commissioner Anbamuthan MP chuan BJP candidate car hmanga EVM phurtu polling party member pali-te chu chhui chian nghal an ni dawn tih an sawi a, an pali hian zirtirtu vek an ni tih a sawi. Hemi rual hian EVM phurtu motor lo beitu lakah criminal case ziahluh a ni bawk.

EC official-te chuan polling party motor pakhat chu kawng lakah a chhiat vangin, motor lo tlan remchang chuan a rawn phur mai niin an sawi a, thil dik lo tih tumna engmah a awm lo niin an sawi. A hnuah chauh he motor hi BJP candidate Pual-a nupui, Madhumita Paul hminga register a ni tih an hria niin an tarlang.

Hetih lai hian ECI chuan motor dang a ngaihtuah sak tur tih a ni a, mahse he EVM phurtu poll party member-te hian lo nghak chhuak peih loin, motor dang an hmang ta mai niin DC chuan a sawi bawk.

Eptu party hrang hrangte chuan he thil thleng hi an sawisel zui nasa hle. Congress hruaitu Priyanka Gandhi Gadra chuan Election Commission-in EVM phurhna atana private motor hman a awm ṭhin chungchangah hma a lak thuai a ngai tih a sawi a, inthlan apiangin EVM phurhna atana private motor hman a awm thu hriat a ni ziah a ni, a ti. Hei bakah hian vote thlakna atan EVM hman a nih chungchang chu national party-te pawhin an ngaihtuah ṭhat leh a ṭul hle a ni, a ti. Party hruaitu dang, Sushmita Dev pawhin he thil thleng chungchanga inhnamhnawihte chungah action lak an phut thu leh, BJP candidate pawh hi disquality an phut thu a sawi.