Inthlan neih laiin BPF candidate-in BJP a zawm

Assam-ah assembly inthlan neih a nih mek laiin, Bodoland Peoples Front (BPF) candidate Rangja Khungur Basumatary chuan Ningani khan BJP a zawm. Basumaary hi April 6-a inthlan thawh thumna neih turah Tamulpur constituency-ah a chuh dawn a ni.

Basumatary hi chin hriat loha ni hnih chhung a bo hnuah, Nilaini zan zanlai khan BJP leader Himanta Biswa Sarma chuan BPF candidate nen hian an inhmuh thu leh, BJP a zawm tur thu a twitter-ah a tarlang a ni. BPF hi Assam-a Congress kaihhruai eptu ṭangrual pawlah an tel a ni.

BJP hruaituin Basumatary-a'n an party a zawm tur thu a sawi hnuah, Basumatary chuan local TV channel-in an kawmnaah election campaign-naah an party, BPF chuan an thawhpui ṭhat loh avangin an party hi a chhuahsan tih a sawi.

Congress MP Manish Tiwari hi ni hnih chhung chin hriat loha Basumatary a bibona chhan chu BJP lamin an vau vang tih sawiin, "BJP chuan dik lo tak pawh ni se, eng kawnga pawhah hnehna chan an tum tawp a ni. He party hian democracy leh democratic system hi a ring ve tak tak lo," tiin, BJP chu party dang leh candidate-te vauna atan National Investigation Agency (NIA) te hman tumah a puh bawk. Chin hriat loha Basumatary ni hnih chhung a awm laia a chung thil thleng chu mipuite hriata puangzar turin BJP sorkar chu a phut bawk.