Covid-19: AP-in ram dang mi hnena PAP pek titawp

Coronavirus, Covid-19 leng mek laka invenna kawng khat atan Arunachal Pradesh sorkar chuan ram dang mi hnena an state luh phalna, Protected Area Permit (PAP) a pek ṭhin chu a titawp. Hemi hma hian Sikkim pawhin ram dang mi hnena Inner Line Permit (ILP) a pek chu a lo titawp tawh bawk. 

Chief secretary Naresh Kumar chuan nimin khan PAP pekchhuahna lama thuneitute chu thupek dang a awm leh hma chuan permit pe tawh rih lo tura  hriattir an nih thu a sawi. Sorkar thuchhuah chuan, "Covid-19 kai hi India ramah pawh hmuh niin, an pung zel tih hriat a ni. India rama he hri a darhna hi Covid-19 lenna rama lo zin tawh emaw, heng ram aṭanga India rama rawn lutte emaw aṭangin a ni tih hriat a ni," tiin, hei vang hian ram dang mi lut tur chu khuahkhirh rih an tum tih a sawi a ni.

State health and family welfare minister Alo Libang chuan an state-ah Covid-19 vei hmuh an la awm lo tih sawiin, district tina deputy commissioner-te chu district medical officer-te nen meeting nei ṭhin tur leh, hri venna kawnga an inbuatsaih leh hma lak dante ennawn ṭhin tura hriattir an nih thu a sawi. Meghalaya sorkar pawhin hri leng mek avang hian March 7-15 chhunga Meghalayan Age Festival a buatsaih tum chu a ṭhulh phah bawk. He festival hi West Jaintia Hill-a Thadlaskein-a neih tura ruahman niin, sorkar lam pawh a inbuatsaih nasa hman hle. Chief minister Conrad Sangma chuan March 13-15 chhung hian sawm bik mi 70-80 vel chauh nen conclave hman a ni thung dawn a, mipui nawlpui tan hawn a ni dawn lo tih a sawi. 

Myanmar ramah Covid-19 kai an awm hriat la ni lo mah se, Manipur leh Myanmar inri bul, Moreh khuaa chengte chuan international border khar turin sorkar an ngen. Moreh Consumers' Club (MCC) chuan hri leng laka invenna atan ramri hi khar a ngai tih sawiin, khar a nih loh chuan Myanmar-ah kai an awm chuan awlsam takin Moreh khuaah pawh hian a darh ve mai dawn tih a sawi. Hei vang hian a rang thei anga invenna kalpui a ngaih thu a sawi. Manipur sorkar hian sorkar office-a hnathawk kalte chhinchhiahna atana bio-metric attentance a hman pawh a titawp tawh bawk a ni. Bhutan ram pawhin hri leng mek laka invenna atan hian an ramri te chu kar hnih chhung atan an khar tawh bawk.