Covid-19 Hmarchhakah a hluar

Assam state-ah Covid-19 kai an pung chak hle a, hri kai hmuh chhuah tawh hi mi 1,216 an tling tawh. 

Health minister Himanta Biswa Sarma chuan Inrinni khan hri kai hmuh chhuah thar mi 159 an awm thu leh, an zinga 20 chu thlawhtheihna hmanga haw an ni tih a sawi.

Hri kai zinga 163 chu enkawl dam an ni tawh a, mi paliin he hri hi an thihpui tawh a ni.  

Kar liam ta Zirtawpni khan hri kai hmuh thar hi mi 177 awmin, hei hi an state-a ni khata hri kai hmuh chhuah an tam ber ni a ni. 

Manipur-ah Inrinni zan khan mi paliin hri an kai tih hmuhchhuah belh a ni a, an state-a hri kai hmuh tawh zat hi mi 66 an tling tawh a ni. 

Inrinni zana hri kai hmuh chhuah tharte hi Delhi aṭanga haw mi pahnih leh Pune aṭanga haw mi pahnih an ni. 

Additional health director Dr K Sasheekumar Mangang chuan hri kai enkawl mek hi mi 59 an awm tih sawiin, an vai hian an ngaihtuahawm lo tih a sawi. Hemi rual hian hri darh zel tur venna atan sorkar chuan theihtawp a chhuah thu leh, hri kai hmuh chhuah tharte nena intawkfuh tawhte pawh chhui zui nghal a ni tih a sawi. 

Chennai aṭanga haw mi pasarih chu nimin khan Covid-19 an kai tih hmuh chhuah a ni a, anni nen hian Nagaland-ah he hri kai hmuh tawh hi mi 43 an tling a ni. 

Nagaland state chhunga hri kai hmuh chhuah hmasa ber chu May 25 kha niin, hmun danga tangkhang haw pathumin hri an kai tih hmuh chhuah a ni. Hemi hnu hian state dang aṭanga haw zingah hri kai hi hmuh chhuah belh zel an ni a, kar khat lek chhungin hri kai hi 43 hmuh an ni hman a ni. 

Health minister  S Pangyu Phom chuan nimina hri kai hmuh chhuah thar zinga pali chu Kohima mi niin, Dimapur mi pathum an tel. 

Arunachal Pradesh-a Inrinni kha Upper Siang district-ah naupang kum 12 miin hri a kai tih hmuh chhuah belh a ni bawk. An state-a hri kai hmuh tawh hi mi pali an tling tawh a, pakhat erawh chu enkawl dam a ni tawh thung. 

April thla khan AP-ah hian an state-a Covid-19 kai  hmasa ber hmuh niin, New Delhi-a Nizamuddin Markaz khawmpuia tel a ni. Hemi hnua hri kai hmuh chhuah mi pahnihte chu Delhi leh Chennai aṭanga haw ve ve an ni. 

Tuna hri kai mek mi pathumte hi an taksaa natna lang chhuak lo, asymptomatic vek an ni a, Covid-19 care centre-ah enkawl mek a ni. 

State health department chuan nimin khan sample 260 chu Delhi-a test turin an thawn tih a sawi. State sorkar chuan an state laboratory sawiselna a awm avangin hmun danga sample thawn hi a rel a ni. 

Tripura-ah pawh hri kai hmuh chhuah belh an awm zel a, an state-a hri kai hmuh tawh zat hi 271 a tling tawh. 

Kar liam ta Zirtawpni khan mi 915 sample test a ni a, heng zinga 17 chuan hri hi an kai tih Inrinni khan hriat chian a ni. Hri kai hmuh chhuah belhte hi Bangladesh aṭanga haw mi pariat bakah Haryana leh Maharashtra aṭanga hawte an ni a, Dhalai district-a Ambassa-a BSF 86th battalion headquarters-a mi pakhatin hri a kai tih hriat a ni bawk. 

Lockdown avanga Tripura mi 129, Bangladesh rama tangkhangte chu sorkarin phalna a pek hnuah hruai haw an ni. 

Chief minister Biplab Kumar Deb chuan thlawhtheihna hmanga hawte pawh test vek an nih thu sawiin, anni erawh chuan an vaiin an negative tih a sawi. Hri darh zel tur veng turin sorkar chuan theihtawp a chhuah zel dawn a ni, a ti. 

Tripura-ah hian hri kai enkawl mek hi 70 an awm a, an zinga 69 chu Covid care centre-ah enkawl niin, pakhat chu GB Pant hospital-ah enkawl a ni. Hri kai zinga 171 chu enkawl dam an ni tawh.