Assam-ah Priyanka Gandhi Campaign

Congress president Rahul Gandhi-a farnu Priyanka Gandhi chu a vawikhatna atan Assam-ah campaign neiin, Pathianni khan Silchar-ah a campaign a ni.

Priyanka chuan NDA sorkar beiin sorkar policy leh thil tum te chu a dik lo hle tih a sawi. Kum nga chhunga sorkar hmalakna chu mipuiin an hria tih sawiin mipuite chu tehtu ṭha ber an nih thu a sawi bawk.

BJP chuan thuneihna an chan hnu lawkah hmarchhak tana dah special category state status chu an tibo nghal tih sawiin, Look East policy hnuaiah Silchar chu sumdawnna hmunpuiah a chang chho hman a, mahse BJP chuan chung hmalakna zawng zawng chu an titawp vek tih a sawi.

BJP sorkar hnuaiah chuan hlawh nei loa hnathawk mi tam tak an awm tawh tih sawiin Prime Minister Narendra Modi pawh a bei zui bawk. Priyanka chuan campaign lai chuan Modi chu hmun tinah hmuh tur a awm tih sawiin, rel kawngah pawh tiffin hawng ula in hmu tho ang, tiin a sawi. Thla hnih liamta chhung khan UP a tlawhkual thu leh, loan chungchanga harsatna tawk loneitu tam tak an awm thu te, hna neih loh vanga harsatna tawk ṭhalai tam tak an awm thu te a sawilang.

Silchar-ah hian darkar hnih chhung road show a nei a, Citizenship (Amendment) Bill (CAB) chungchang te pawh sawichhuakin CAB chu an do zel dawn thu a sawi bawk. Silchar hi UP baka Pri­yanka Gandhi campaign-na hmasa ber a ni a, Silchar hian April 18 hian inthlan an hmachhawn ang.