EC official-ten inthlan buaipui turin Ft. 13,583 zeta sang kal

Election Commission (EC) official ṭhenkhat chu Arunachal Pradesh-a Mukto Assembly Constituency-a Luguthang thingtlanga inthlan buaipui turin ft. 13,583 zet trekking in an kal.

EC thupuangtu Sheyphali Sharan chuan Mukto Assembly constituency-a ft. 13,583 zeta sanga awm Luguthang khuaah inthlan buaipui turin EC official-te an kal thu a sawi a, harsatna hrang hrang hmachhawn mah se inthlan an buaipui zo thei tih a sawi.

Arunachal Pradesh-ah hian kal harsat tak takna hmunte a awm nual avangin hmun ṭhenkhat chu kawng lakah ni hnih zet thang te a ngai a, polling official ṭhenkhat phei chu helicopter hmang ten vote thlak an buaipuina tur hmunah te an kal a ni.

Arunachal-ah hian voter 7,98,249 awmin, polling station 2,202 a awm. Kumin hian EC official-te hian a tam thei ang berin vote an thlak theih nan nasa takin hma an la a, electronic, social, print leh media dangte hmangin nasa takin an campaign bawk.

April 11-a Lok Sabha inthlan thawh khatna neih rual khan Arunachal Pradesh hian state assembly inthlan an hmachhawn nghal a, vote 66% vel a tla niin EC chuan an sawi. EC lam thuchhuahin an tarlan danin Arunachal-ah hian mi nuai 7.98 velin vote an thlak a, mahse hei hi final report a la ni lo niin an sawi bawk.