Meghalaya-ah vote 71.48% tla

Lok Sabha inthlan thawh khatnaah khan Meghalaya-ah chuan vote 71.48 % tla in, beisei aiin vote a tla ṭha a ni.

2014 Lok Sabha inthlanah khan Meghalaya-ah hian vote 68% a tla a, kuminah hian 2014 ai khan 2.57% in a tla tam zawk a ni. 2009 khan 63% chiah a tla thung.

CEO FR Kharkongor chuan 1998 Lok Sabha Assembly inthlan khan vote 74.38% tla in, Lok Sabha inthlan an hmachhawn tawha vote tlak ṭhat ber ṭum a nih thu a sawi a, kumin chu a pahnihna a nih thu a sawi.

State Chief Electoral Officer chuan Shillong Parliamentary constituency-ah 65.49% a tla a, Tura Parliamentary constituency-ah erawh 81.20% zet a tla tih a sawi bawk.

Meghalaya-ah hian voter 19,14,795 awmin, kumin inthlanah hian mi 13,64,259 in vote an thlak a ni.

CEO chuan hmeichhe vote thlak an tam zawk tih a sawi. Seat hnihah hian mipa aiin hmeichhia vote thlak an tam zawk ve ve tih a sawi a ni.