Manipur-a NPP minister-te paih a ni dawn lo : Conrad
Meghalaya chief minister leh National People's Party (NPP) national president Conrad Sangma chuan Manipur-a BJP kaihhruai ṭangrual sorkara NPP minister te paih an ni dawn nia thuthang awm chu a dik lo a, NPP minister-te hi paih an ni dawn lo tih a sawi.
Kum 2017-a BJP kaihhruai ṭangrual sorkar siam a nih dawn khan, NPP MLA-te chu kum nga term chhungin minister-ah dah an ni ang, tiin an inrem a ni. Conrad chuan he thutiam hi Amit Shah ngeiin a siam a ni tih a sawi bawk.
NPP hruaitu Sangma hian kar liam ta khan ni hnih chamin Manipur hi a tlawh a, Inrinni khan Nagaland-a NPP meeting-a tel turin a kal leh. Manipur-a a cham chhung hian an party thuam chak dan sawipuiin NPP Manipur state hruaitute a kawm. NPP hian Manipur hill district-a autonomous district council election neih tura party mala chuh a tum a ni.
Manipur assembly inthlan, kum 2017-a neihah khan BJP hi seat la hnem ber dawt niin, Congress in seat 28 a lak laiin seat 21 a la a ni. Mahse hetichung hian NPF MLA pali; NPP MLA pali; LJP, Trinamool Congress leh independent MLA pakhat ṭheuhte nen ṭangrual sorkar an din zawk a ni.