Manipur: Outer LS seat-a booth Pahnihah inthlang ṭha dawn

Lok Sabha inthlan thawh khatnaah khan Manipur-a LS seat pakhat zawk Outer Mani­pur constituency-ah inthlan hi neih a ni a, hetah hian hmun hnihah misual tu tih hriat loh ten EVM leh VVPAT an tihchhiat avangin booth pahnihah inthlan ṭhat buatsaih a ni dawn.

Official-te chuan polling station-ah hian inthlanni, April 11 chawhnu dar 1.30 velah khan misual tu tih hriat lohte chuan Poi leh Chingkhai thingtlang khuaa booth pahniha EVM leh VVPAT-te chu an tichhia tih an sawi. Poi leh Chingkhai khuate hi Myanmar border-a awm niin Chief Electoral Officer (CEO) PK Singh chuan security force-ten hma an lak dawn chuan misualte hi an tlan bo hman tih a sawi.

Hemi chungchangah hian FIR thehluh niin police-te chuan an chhui zui mek a, CEO chuan Election Commission in inthlan ṭhat ni tur an tichhuak leh thuai dawn tih a sawi a ni. Inner Manipur constituency chuan April 18 hian inthlan an hmachhawn ang.