Tripura: Left leh Congress-in rigging a thleng tih sawi
Tripura-a eptu party lian pahnih Left Front leh Congress chuan inthlan thawh khatna neih zawh takah khan rigging a awm tih sawiin, April 18-a inthlan thawh hnihna neih turah chuan mipuite chu fimkhur turin an chah.
Inthlan thawh khatnaah khan West Tripura Lok Sabha constituecy-ah inthlanna neih niin 77.6% vote a tla a ni.
Left Front Convener leh CPI(M) central committee member, Bijan Dahar chuan inthlan thawh khatna chu BJP in an tichingpen tih sawiin inthlan thawh hnihnaah pawh thil a danglam a rin loh thu a sawi.
Tripura Congress spokesperson Harekrishna Bhowmik pawhin an party aiawhte chuan Inrinni khan New Delhi-a Election Commission official-te an hmuh thu sawiin, April 18-a inthlan thawh hnihna East Tripura constituency-a an neih turah polling booth awm zawng zawng 1645-ah central force dah an ngiat thu a sawi a ni.
Hetihlai hian BJP chuan CPI(M) leh Congress in an puhna chu thu tling lo leh behchhan nei lo a nih thu an sawi. BJP spokesperson Nabendu Bhattacharya chuan eptu party-te chu mipuiin an enhrang tawh tih sawiin, hetiang thil an sawi chhan hi tharum thawhna leh buaina chawhchhuah an tum vangah a puh thung.
Tripura Left Front Committee aiawhte chuan Inrinni khan Tripura Chief Electoral Officer Sriram Taranikanti an hmu bawk a, inthlan thawh khatnaa model code of conduct bawhchhiat a nih chungchang te an thlen a ni.