Assam Congress-in lungawi lohna lantir

Assam Congress chuan assembly inthlan thawh hnihna, April 1-a an neihah electronic voting machine (EVM) kaihhnawihah thil fel tawk lo eng emaw zat a awm nia sawiin, Inrinni khan Dispur-a Manabendra Complex-ah lungawi lohna an lantir.

Congress party chuan an state-a rorellai, BJP sorkar chu EVM tihchinpgen tumah puhin, in thlan thawh hnihna neiha vote thlakna atana hman, EVM chu BJP candidate pakhat motor-ah hmuh a ni a, BJP thil tum dik lo tak chu man chhuah a ni ta tih an sawi.

Eptu party chuan he thil thleng chungchangah hian Election Commission of India pawh inrawlh turin an ngen a, an mithmuhah ngei dik lo taka thiltihna hi a thlen avangin Constitutional Rights leh Ballot Privilege humhalh tura an chet a ngaih thu an sawi a ni. Election Commission chu ṭan bik nei loa awm tur leh, democracy chawinungtu ni tura an duh thu an sawi bawk.

Congress party chuan April 6-a inthlan thawh thumna neihna tura an thawhpui, Bodoland People's Front (BPF) candidate-in candidate tihfel vek tawh hnu, vote thlak hun hma lawka BJP a zawm chungchangah a dinna bial, Tamulpur constituency-a vote thlak hun chu sawn turin an phut bawk. Hemi chung­chang hi Inrinni khan Election Commisison chuan con­stituency returning officer nen­a ngaihtuah a, mahse an thutlukna siam erawh an la puang lo. He biala inthlan hun sawn tura an ngen bakah, Congress party chuan BPF candidate-in BJP a zawm thu a puan hma lawka meeting neihpuitu, BJP leader Himanta Biswa Sarma chungah pawh action la tura an phut thu an sawi.