'Assam-ah coronavirus a awm lo, mask vuah a ngai lo' - Himanta Biswa Sarma
India ramah Covid-19 hri leng thawh hnihna a thlen mek laiin, Assam health minister Himanta Biswa Sarma chuan interview a neihah, Assam-ah coronvirus a awm lo a, mask vuah ṭulna a awm lo niin a sawi.
The Lallantop-in an kawmnaah, Sarma chuan state hrang hrangah Covid-19 hri leng vanga khuahkhirhnate tihkhauh a nih laiin Assam-ah chuan he hri hi awm lo tluk deuh thaw a ni tawh tih a sawi. "Sorkar laipui chuan hri leng chungchangah kaihhruainate a siam a, mahse Assam chu Covid-19 hian a chhuahsan tawh a ni," a ti. Mask vuah chungchangah pawh an state-ah hri a awm tawh loh avangin mipuite tichiai a, mask vuah tura tih a ngai lo tih a sawi. "A tul hun alo thleng leh a nih chuan, mipuite chu kan hrilh leh mai dawn a ni," a ti.
Minister chuan economy lam ngaihpawimawh a hun tih sawiin, "Kan state economy tihchak kan duh tawh a ni. Mask i vuah chuan, engtinnge parlour-te i hawn theih ang? Beauty parlour-te pawhin an sumdawnna an kalpui chhunzawm zel a ngai tawh a ni," tiin a sawi.
Expert ṭhenkhatte Assam assembly inthlan zawhah Covid-19 hri kai an pun chhoh nasat a hlauthawnawm hle nia an sawi pawh Minister hian chhangin, "Bodoland Territorial Council inthlan neih dawnah pawh hetiang hian an sawi a, mahse a hnu lamah engmah a thleng zui lo. Assam inthlanah pawh hri a pun a hlauhawm thu sawi mah se, engmah a thleng lo ang," a ti.