ULFA(I) ten ni 100 chuang hnuah an mi hren pakhat chhuah

United Liberation Front of Asom (Independent) helpawl chuan nikum December 2-a Quippo Oil and Gas Infrastructure Limited hnuaia thawk mi pahnih an man zinga pakhat chu kar liam ta Inrinni khan an chhuah.

Inrinni chhun dar 12:30 khan ULFA (I) te hian an mi hren pakhat zawk, kum 51 mi Pranab Kumar Gogoi chu Arunachal Pradesh-a Changlang district-a Longvi khaw bulah an chhuah. Gogoi hi Assam-a Sivasagar district-a mi a ni a, Quippo-ah hian drilling superintendent in a awm a ni. Nikum December 31 khan helpawl hian radio operator, Bihar mi Ram Kumar (35) nen Changlang aṭang hian an rubo a, Myanmar lamah an hruai zui a ni.

Changlang police superintendent Mohin Gambo chuan Arunachal police team chu ramhnuaiah kalin, Pranab Kumar Gogoi hi an va hruai chhuak tih sawiin, thu an zawtfiah nghal tih a sawi. Ram Kumar erawh a chin hriat a la ni lo. Mahse ULFA(I) hian an mi hrente hi a hran ve vein an chhuah dawn tih an lo sawi tawh a ni.

Helpawl hian an mi man pahnihte tlanchhuahna atan hian Delhi-a headquarters nei, Quippo company lakah hian cheng vaibelchhe 20 an phut a ni. Company official leh ULFA(I) aiawhte inbiakna an neih hnuah an mi hren pakhat hi an chhuah a, an sum phut hi an inpe tih erawh sawilan a ni lo.