Nungcha humhalh tura sawmna chhangin AP-ah mi 300 chuangin air gun thehlut

Arunachal Pradesh sorkarin an state-a ram vak ṭhinte an thiltih bansan a, nungcha humhalhna tura mipuite zirtirna leh sawmna tur, ‘Air Gun Surrender Abhiyan’ a siam chu kar liam ta Inrinni khan East Siang district-a Parsighat khuaah hawn a ni a, he hunah hian mi 300 chuang chu ramvak tawh lo tura intiamin, an air gun an thehlut. Air gun hi a tlangpuiin sava vehna atana an hman ṭhin a ni.

Pasighat-a inkhawm hi forest and environment department buatsaih a ni a, Jawaharlal Nehru College campus-a hun hmanah hian chief minister Pema Khandu, union sports and youth affairs minister Kiren Rijiju leh state forest and environment minister Mama Natung-te pawh an tel.

CM Khandu chuan nungcha humhalh tura sawmna mipuiten an ngai pawimawh chu lawmawm a tih thu sawiin, hemi kawnga campaign an neih pawh a hlawhtlin chhoh zel a beisei thu a sawi. "Tunhma chuan kan chaw tur zawngin kan ram vak ṭhin. Mahse hun a inthlak danglam tawh a, ramvah ngai loin ei tur leh chaw mamawh pawh kan hmu thei vek tawh a ni," a ti. Sava veh ṭhin pawh sim a hun tak zet tih a sawi bawk.

Mipuiten ram sa ei lo tura an intiam theih loh chuan an campaign pawh chu a hlawhtling tluantling thei dawn lo tih sawiin, ram sa ei lo tura intiam ngam turin a ngen.