Manipur: RIMS Nursing hostel a kang

Manipur state khawpui Imphal-a College of Nursing, Regional Institute of Medical Science (RIMS) hmeichhe hostel building chu nimin chawhma dar 10.20 velah khan a kang.

Hostel kang hi B.Sc nursing student, 1st year awmna building niin a kang chhe vek a, Fire department lamin ṭhelh mah se bungrua engmah chuh hman a ni lo.

Report dawn danin thi leh hliam an awm lo a, class kal reh lai a nih avangin kangmei chhuah chhan hi hriat a ni lo bawk.

Vanglaini zawhna chhangin RIMS medical student pakhat chuan he buildingah hian mi 70 vel an awm thu a sawi a, Mizo pawh an awm nual tih a sawi bawk. Mizo zingah 1st year zirlai panga leh 2nd year zirlai pahnih bungrua pawh chuh hman loha a kanral vek thu a sawi a ni.

Regional Institute of Medical Science-ah hian MBBS, BDS, Nursing leh Post Graduate (Specialist) zirna a awm a, nursing bikah hian Mizoram sorkar quota seat panga a awm a ni.