EC-in Tamulpur bial inthlan hun sawn tura ngenna a hnawl

Election Commission of India chuan Assam assembly inthlan thawh thumna neih tura Tamulpur biala Bodoland People's Front (BPF) candidate Rangja Khungur Basumatary-a'n Bharatiya Janata Party (BJP) a zawm avanga he biala inthlan neih hun tur sawn tura BPF leh Congress party ngenna chu a hnawlsak.

April 6-a assembly inthlan thawh thumna neih tura BPF official candidate, Basumatary-a'n inthlan neih hma lawka BJP a zawm chungchangah, BPF leh a thawhpui Congress party chuan Basumatary leh BJP a zawm thu a puan hma lawka meeting neihpuitu, BJP leader leh Assam cabinet minister Himanta Biswa Sarma-te chungah action lak an phut thu an sawi a, hei bakah hian Tamulpur biala inthlan neih hun pawh sawn an phut bawk.

BPF hotu Hagrama Mohiliary chuan Supreme Court-ah hemi chungchang hi a thlen bawk a, mahse chief justice of India SA Bobde chuan inthlan kalpui lai mekah court chu a inrawlh thei lo niin a sawi. Hei vang hian Supreme Court-a petition thehluh hi nimin vek khan hnukkir leh niin, Gauhati High Court-ah kalpui an tum.

Inthlana chuh tuma nomination paper thehlutte inhnuhdawh hun tawp thlengin Basumatary hi BPF member a ni a, mahse hemi chungchangah hian EC chuan inrawlh a tum lo tih sawiin, BJP chu nawrh luihna vanga zawm a ni lo niin a sawi. Vote thlak ni sawn chungchang chu candidate thihna a thlen chauhin a theih a ni, a ti.

EC chuan Congress leh BPF ngenna thehluh chungchangah Basumatary hi video conference a neihpui tih sawiin, he hunah hian Tamulpur returning offier pawh a tel. BJP zawm tura nawr luih a nih loh thu leh, ama duh thu ngeia zawm a ni tih a sawi a ni, tiin EC chuan a sawi.

Candidate-te inhnuhdawh hun a tawp tawh avangin Basumatary hian a dinna bialah BJP thawhpui, UPPL candidate Leho Ram Boro chu a thlawp dawn tih a sawi.