Media-te vaua puhna chhang turin Tripura sorkar hrilh

Press Council of India chuan Tripura sorkar hnenah state chhunga media mite vau a, beih an ni ṭhin nia journalist pawlin complaint a thehluh chungchang chu chhang turin a ti.

PCI secretary Anupama Bhatnagar chuan Assembly of Journalists (AOJ)-in complaint an thehluh chungchangah Tripura chief secretary, home secretary leh Director General of Police (DGP) te chu lehkha thawnin, insawifiah turin a ti a ni.

Tripura home secretary Saradindu Choudhury chuan PCI hnena aṭangin state sorkar chuan lehkha hi a dawng ngei tih sawiin, chhanna erawh an la pe lo niin a sawi.

AOJ-in complaint an thehluhah hian September 11 khan chief minister Biplab Kumer deb chuan Sabroom sub-division-a thu a sawinaah media mite a vau tih an sawi a, he a thusawi avang hian state chhungah media mite beih an tawk zui fo a ni, an ti. CM-in media mite vauna thu a sawi aṭanga thla ruk chhungin Tripura-ah journalist 23 chu beih leh kutthlak an ni tih an tarlang.

CM Deb hian nikuma September thlaa thu a sawiah, an state-a chanchinbu ṭhenkhat chu thu dik tawk lo leh, mipuite rilru tihbuai tuma thu chhuahah a puh a, hei vang hian engtikah mah an ngaihdam ngai loh tur thu a sawi a ni. Mahse CM media advisor, Sanjoy Mishra chuan CM thusawi hi sawichhuah a nih dan hi a dik tawk lo niin a sawi thung.