Tripura MP candidate chuanna car lungin vawm TPCC President Pradyot lakah thubuai ziaklut

Tripura police-te chuan state Congress chief Pradyut Kishore Deb Barman chu police thuneihna huamchhunga mi pakhat a ben avangin a lakah thubuai an ziaklut.

East Tripura Lok Sabha con­­stituency MP candidate leh Pra­dyut-a farnu ni bawk Pragya Dev Burman chu Ningani khan Khowai district-a rally a kal haw lam chu Indigenous People's Front of Tripura (IPFT) thlawptu mi pakhatin a convoy lungin a vawm a, pawikhawihtu hi man nghal a ni.

Pragya Dev Burman chuan rally an kal haw lam chu Tulashikhar area-ah IPFT thlawptu hian a car chu lungin a lo vawm tih sawiin, a vawmtu bulah hian midang pawh an awm nia a hriat thu a sawi.

Hemi hnu hian Tripura Congress chief leh a thawhpuite chu police in an mi man an dahna room-ah hian lutin, an mi man hian chibai lo buk a tum chu Pradyut Kishore hian a hmaiah a beng ta a ni. Hemi hnu hian nasa takin a hau zui a, police-te chuan an lo ṭhelh bawk.

He thil thleng hi CCTV footage aṭangin chiang taka hmuh tur a awm a, social media lamah nasa takin a darh zui a ni.

IPFT lam chuan anmahni thlawptu in lungin a lo vawm tih hi an pha thung a, BJP hruaitu hlun Ratan Lal Nath chuan Congress beih nana hmang zui bawkin video footage chuan Pradyut Dev Burman-an an khingpuite laka chhiatna thlen a tum tih a langchiang hle tih a sawi. Police station chhungah mi kut a thlak duh a nih chuan hmundangah chuan tual a that duh ang, a ti.

Hetihlai hian Congress chuan BJP leh IPFT chu misual humhim tumah an puh thung.

Tripura hi Ningani-a inthlang tura tih kha ni mah se inthlan kaih­hnawihah hmun hrang hrangah tharum thawhna thleng report a awm avangin inthlan hun hi April 23 a neih turin sawn a ni.

Election Commission (EC) chuan April 11-a Tripura West Lok Sabha constituency-a inthlanna thawh khatna neih nia buaina chhuahnaa inhnamhnawiha puh, presiding officer-te leh political activist-te lakah FIR an thehlut dawn nia sawi a ni a, EC lam hian Tripura CEO pawh Delhi-ah an ko bawk.

Inthlan thawh khatnaah khan Congress leh Left Front chuan BJP chu inthlan tichingpenah an puh a, mahse BJP chuan hei hi an pha thung a ni.