Manipur-in Lok Sabha inthlanna nei zo Phal loh thil Rs. vbch. 37.55 hu man
Manipur chuan kar kalta Ningani khan Lok Sabha inthlan thawh hnihna Inner Manipur Constituency-ah neiin Lok Sabha inthlan chu Manipur tan chuan zawh fel a ni ta a, constituency pahniha vote tla zawng zawng hi 82.75% a ni.
Manipur Chief Electoral Officer (CEO) P K Singh chuan Lok Sabha inthlan hnuhnung ber ai khan vote hi 2.67% in a tla tam zawk tih a sawi.
Manipur bikah hian Senapati district-ah vote tla ṭha berin 92.74% in vote an thlak a, Jiribam-ah tla chhe berin 68.21% in an thlak thung. State pumpuiah hian voter 19,59,429 an awm a, heng zinga 16,04,659 hian vote an thlak a ni. Singh chuan mipa aiin hmeichhia vote thlak an tam zawk tih a sawi.
CEO office chuan complaint an dawng nual tih tarlangin April 18-a inthlanah pawh khan polling booth capture leh EVM pahnih misualin an tichhia tih report an dawn thu pawh an sawi a ni.
Manipur-ah hian voter 19,59,429 awmin mipa 9,43,426 leh hmeichhia 9,95,773 an awm a, third gender 45 an awm bawk. May 23 hian vote tla hi chhiarin result puan a ni ang.
Buaina a chhuak
April 18-a inthlan thawh hnihna neihah khan vote 80.27% a tla a, hmun ṭhenkhatah chuan inthlan ṭhat a ngai dawn niin CEO chuan a sawi a, ngenna pawh an thlen mek thu a sawi.
Keirao assembly constituency, Imphal East district-a Kiyamgei High Madrasaa 6/10-ah chuan buaina a chhuah avangin presiding officer leh micro observer-te chuan hliam an tuar.
He polling station-ah hian voter-te chuan dik tak leh zalen takin vote an thlak thei lo nia sawiin station hi an bei a, EVM, VVPAT leh security camera-te pawh an tichhia a ni.
Mipui thinrim pungkhawm hnawt darh tur hian CRPF-te chu tirh niin van lam hawia silai an hmehpuah bakah lathi charge-te pawh a thleng a, mi pali in hliam an tuar. Report-a tarlan a nih dan chuan mipui thinrim hian dar 11.20 velah polling station hi an suasam.
Hliam tuar presiding officer, Lovely Singh chuan vote inthlak sak a phal loh avangin buaina hi a chhuak ta niin a sawi.
6/20 Urup Muslim polling station-ah pawh polling agent-te leh misual tu tih hriat loh te chuan tlai dar 3 velah EVM an tichhe bawk a, CEO chuan hemi chungchangah hian FIR pawh an thehlut tawh tih a sawi a ni.
Election Commission of India (ECI) hnenah heng station pahnihah hian inthlan ṭhatna nei tura rawtna an siam mek thu CEO chuan sawiin vawiin hian inthlan ṭhatna hi an nei maithei tih a sawi.
Phal loh thil man hnem
CEO PK Singh chuan March 10-a inthlan hun tur puan a nih hnu khan phal loh thil an man tawh zawng zawng chu cheng vaibelchhe 37.55 hu a nih thu a sawi. Manipur-a an thil man tawh zawng zawng hi Assam-a man aiin a let hnihin a tam tih a sawi. An thil man zingah hian ruihhlo, ralthuam leh pawisa te a tel a ni.