Kum nga chhungin firfiak beihna 177% in pung, Inthlan dawnah chiah PM-in venhimna ngaihtuah: Mukul Sangma

Meghalaya Congress hruai­tu hlun leh Chief Minis­ter hlui Mukul Sangma chuan kum nga kalta chhung khan firfiak beihna 177%-a a pun thu sawiin, Prime Minister Narendra Modi chu inthlan dawn hnaih chauha venhimna kalpui ulukah a puh.

North East Congress Coordination Committee chairman Mukul Sangma chuan sorkar laipuiin Jammu and Kashmir, hmarchhak, Chhattisgarh leh state danga an hmalakna chuan boruak a tichhe zual zawk tih a sawi. Modi chu ram venhimna kawngah a hlawhchham hle niin a sawi bawk.

Sangma chuan Rajya Sabha a data dah-ah chuan kum nga kalta chhung khan firfiakte beihna 177% in a pung tih tarlan a nih thu sawiin, sorkar chuan inthlan dawnah chiah venhimna an ngaihtuah niin a sawi a ni.

Jammu and Kashmir, hmarchhak, Chhattisgarh leh state dangah te chuan nitinin indona a thleng tih sawiin hemi kawnga sorkar hmalakna chuan a tizual hle tih a sawi bawk. Buaina tam zawk a thlen zel bakah mipuite enhranna a thleng nasa a, chumi vang chuan hel pawl zawm an pung nasa hle tih a sawi bawk.

Modi leh a team-te chuan venhimna kalpui dan tur leh buaina hmachhawn dan chu an hre lo tih sawiin, Citizenship (Amendment) Bill kalpui an tum ṭalh dan aṭang chuan BJP chu anti-northeast an nih tih a langchiang hle niin a sawi.

BJP-Assam senior minis­ter pakhat chuan sorkar laipui­ah thuneihna an chang leh a nih chuan June emaw July velah emaw chuan bill chu putluh leh an tum tih a sawi thu Sangma chuan a sawilang bawk.