Assam inthlan thawh hnuhnung ber nei

Assam assembly inthlan thawh thumna leh a hnuhnung ber chu nimin khan constituency 40-ah neih a ni.

Assembly bial 40-a inthlan neihnaah hian candidate 337 an awm a, an zingah hian finance minister nilai Himanta Biswa Sarma, state BJP president Ranjeet Kumar Dass leh cabinet minister dang panga an tel. Vote nei mi 79,19,641 awmin an zinga 40,11,539 chu mipa an ni a, hmeichhia 39,07,963 bakah third gender 139 an awm bawk.

Inthlan thawh thumnaah hian venhimna hna thawk turin security force company 320 duty tir an ni. Polling station 11,140 siam a ni a, inthlan buaipuitu mi 45,604 an awm. Assam assembly inthlanah hian BJP kaihhruai NDA leh Congress kaihhruai Grand Alliance-te chu inbei ber tura ngaih an ni. Party thar, Assam Jatiya Parishad (AJP) pawh an thawm a na viau bawk.

Inthlan thawh thum neihnaah hian AJP hian candidate 22 neiin, independent candidate 126 zet an awm bawk. BJP chuan seat 20-ah chuhin, a thawhpui Asom Gana Parishad (AGP) chuan bial kua leh United Peoples Party Liberal chuan bial riatah an chuh bawk. Congress-in bial 24-ah candidate siamin, a thawhpui AIUDF-in bial 12, Bodoland Peoples Front (BPF) in bial riat leh CPI(M) in bial khatah an chuh bawk a ni.

MCC bawhchhiatna case 2,813 a awm
Assam assembly inthlan neih tur puan a nih a, model code of conduct (MCC) hman ṭan a nih aṭangin MCC bawhchhiat chungchangah complaint 2,813 a lut tih chief electoral officer Nitin Khade chuan a sawi.

Complaint thehlut zinga 1,347 hi cVigil app-ah online-a thehluh a ni a, a dang 1,499 chu offiline-in, Form B9 hmanga thehlut a ni. Online hmanga complaint thehluh 947 chu hnawl a nih thu Khade chuan a sawi bawk. Expenditure kaihhnawihah FIR 56 thehluh niin, heng zinga 46 chu police-te thehluh a ni a, static surveillance team (SST) in pariat leh flying squad (FS) in pahnih an thehluh a ni. FIR 56 zinga 24 hi inthlah thawh thumna kaihhnawha mi a ni.

Campaign hun chhunga thuneituten pawisa fai cheng vaibelchhe 26.05 bakah, zu litre 19,34,037.82, Rs vbc 36.50 hu leh, ruihhlo Rs vbc 34.38 hu, tlereuh Rs vbc 3.69 hu bakah dan phal loh thil dang Rs vbc 15.18 hu an man bawk.