Meghalaya Health Minister-in fimkhur turin chah

Meghalaya health minister AL Hek chuan an state-ah Covid-19 hri kai an pung chho leh tih sawiin, mipuite fimkhur turin a chah.

Minister chuan, "State dang aṭanga lo haw bakah, zirlai leh hnathawk tur rawn lut an awm zel a, hei vang hian hri kai pawh an pung chho leh ṭan a ni. Mipuite chu fimkhur turin kan ngen nawn leh a, kan fimkhur viau loh chuan hri kai hi kan pun belh zel dawn a ni," a ti. Mipuite an fimkhur loh a, sorkarin kaihhruaina a siamte zawm ṭhat a nih loh chuan hri leng chu thunun theih lohin a awm leh dawn a, sorkar tan pawh lockdown puan a ngaih leh mai a hlauhthawnawm thu a sawi.

April 1 khan Megha­laya-ah hian Covid-19 hri kai enkawl lai chu mi 50 an ni a, mahse April 4-ah chuan hri kai mek hi 102-ah an pung chho hman a ni.

AL Hek chuan pawn chhuahna leh pun­khawmnaah mipuite chuan Covid-19 protocol an zawm ṭha lo hle tih sawiin, hei hi thil ṭha lo tak a ni, a ti. "Mipuite an fimkhur loh a, ngaihṭha taka an awm mai chuan hri leng thawh hnihna hi thleng thei reng a ni," a ti.

Health department chuan state dang aṭanga Meghalaya lut turte tana kaihhruaina a lo siam tawh pawh siamṭha lehin, Maharashtra, Karnataka, Kerala, Tamil Nadu, Punjab, Delhi, Haryana, Madhya Pradesh, Chha­ttisgarh, Chandigarh leh Gujarat state aṭanga kal turte chuan RT-PCR negative report an neih a ngai a, RAT negative report chu an pawm dawn lo a ni. Negative report nei lote chu entry point-ah RT-PCR test neih sak zel an ni bawk ang.