Kohima-ah mask vuah lo dap runpui nei

Nagaland state-ah Covid-19 hri kai an pun chhoh leh tak avangin hri leng darh tur venna kawngah khauh zawk hma lak ṭan leh a ni a, state khawpui Kohima-ah chuan pawn chhuahna face mask vuah lote dap runpui neih leh a ni.

Additional deputy commissioner (ADC) Bhavani Sri hoin police team chuan Thawhṭanni khan khawpui chhunga hmun pariatah face mask vuah lote dap hna hi thawkin, mi 293 manin pawisa chawi tir an ni a, an pawisa chawi tlingkhawm hi Rs 29,100 a tling.

ADC chuan hri kai an pun leh avang te, mipuite hri leng laka invenna tura kaihhruaina siamte an ngaih pawimawh tak loh avang tein mask checking drive hi neih a nih thu a sawi. Mipuite chu fimkhur tur leh, sorkar dan siamte zawm ṭha tura inzirtir ṭhat leh a ṭul tih a sawi bawk.

Hri kai pung zel tur venna kawng khat atan state sorkar pawhin Covid-19 test a tam thei ang bera neih leh a tum a ni.

Kar liam ta khan Kohima-a training institute pakhatah hri kai mi 132 hmuh chhuah thar an ni. Health department chuan hmun dangah pawh hri hi a darh chhoh leh theih reng thu sawiin, mipuite chuan hri laka inveng tura ṭan an lak thar leh a ngai tih a tarlang.