Tripura-in inthlan thawh hnihna nei dawn Security force 9,300 dah lut

Tripura East seat consti­tuency-ah vawiin hian Lok Sabha inthlan neih a ni dawn a, hei hi Tripura-in kumin Lok Sabha inthlan an zawhna tur a ni tawh ang.

Tripura East-ah hian candidate 10 an awm a, hmeichhia pahnih an awm bawk. Communist Party of India-Marxist (CPI-M) sitting MP Jitendra Chou­dhury, Bharatiya Janata Party candidate Rebati Tripura leh state Congress chief Pradyot Bikram Ma­nikya Deb Barman farnu Maharaj Kumari Pragya Deb Barman chu Congress in an dintir bawk a, anni pathum hi boruak nei lian ber an ni a, inkhing tawk tur bera ngaih pawh an ni.

Tripura inthlan thawh hnih­na hi April 18 khan neih tura ruahman ni mah se tharum thawhna a thlen hlauhthawn thilah vawiina inthlang tur hian an tikhawtlai a ni. Eptu party CPI-M leh Congress chuan inthlan thawh khatna neihnaah khan BJP chuan inthlan an tichingpen niin an puh a, hmun ṭhenkhatah chuan tharum thawhna a chhuak zui bawk.

Tripura-ah hian Lok Sabha seat hnih a awm a, East Tripura seat bikah hian Left Party-te chuan 1952 hnu lamah khan vawi 12 hnehna an chang tawh a, Congress in vawi li hnehna an chang ve tawh thung.

BJP hian Tripura-ah hian tunhma in boruak nei lian vak ngai lem lo mah se nikum state Assembly inthlan aṭang khan boruak an nei lian chho hle a, chu chuan Tripura Lok Sabha inthlan boruak hi a ti ngaihnawm hle a ni. Chief Electoral Officer (CEO) Sriram Taranikanti chuan voter 12,57,944 an awm thu sawiin heng zinga 6,20,291-te hi hmeichhia an nih thu a sawi.

Venhimna ngaipawimawh
Election Commission (EC) chuan Tripura LS inthlan thawh hnihnaah hian buaina a chhuah lohna turin theihtawp an chhuah a, venhimna kalpui tur security force 9,300 Tripura East constituency-ah an dahlut.

Police-te chuan central para-military force 5,300 leh Tripura State Rifles (TSR) 4,000 dahluh an nih thu sawiin, inthlanna dik leh zalen tak a awm theih nan anni hian venhim hna uluk taka an kalpui dawn thu an sawi.

Returning Officer Vikas Singh chuan district paruka hmun 1,349-a polling booth 1,654-ah security force-te hi an dah deuh vek dawn tih a sawi. Dhalai district Collector leh District Magistrate ni bawk Singh chuan venhimna chu an uluk hle tih sawiin fimkhur zual ngai lai hmun nia an hriatah te chuan patrolling pawh uluk taka neih a nih thu a sawi bawk.

CEO chuan polling agent-te leh candidate-te chu venhimna khauh tak pek an nih thu sawiin a ṭul a nih chuan voter zawng zawngte pawh venhimna an pe mai dawn tih a sawi a ni. EC official-te chuan Senior EC official, CEO leh DGP bakah RO-te chuan a khat tawkin ven­himna kalpui dan video confe­rencing hmangin an ennawn reng tih an sawi bawk.