Vawiinah Assam-in Lok Sabha inthlan thawh thumna nei dawn

Assam chuan vawiin hian Lok Sabha inthlan thawh thumna an hmachhawn dawn a, Constituency pali-ah inthlan hi an nei ang.

Inthlan thawh thumna an neih tur hi Assam bikah chuan kumin LS inthlan atan chuan a hnuhnung ber tur a ni tawh dawn a, ramchhung hmun dangah erawh inthlan hi neih chhunzawm zel a la ni dawn thung. Kokrajhar (ST), Dhubri, Barpeta leh Gauhati constituency-ah te inthlanna hi neih a ni dawn a ni.

Pathianni tlai dar li thleng khan inthlan thawh thumna atana campaign hi neih phal a ni a, vawiin hian venhimna khauh tak karah inthlan hi an nei dawn a ni.

Assam-a constituency pali inthlan neih turah hian candidate 54 an awm a, seat tam berah hian BJP leh Congress chu inkhing ber tura ngaih an ni a, Gauhati seat bikah hian candidate 17 inkhing tur an awm thung. Polling station 9,577-ah inthlanna hi neih a ni dawn a, heng zingah hian hmeichhe pual bika polling station siam 147 a awm bawk.

Assam-ah hian Lok Sabha constituency 14 awmin, April 11 leh April 18 khan inthlan thawh khatna leh thawh hnihna neih a ni tawh. Assam hian hmarchhak LS inthlan an khar dawn a ni.