Assam leh Tripura-in LS inthlanna zo
Assam leh Tripura chuan nimin khan Lok Sabha inthlanna an nei a, heng state pahnihte hian hmarchhak Lok Sabha inthlan an khar a ni.
Assam hian a thawh thum nan inthlanna hi an nei a, Tripura hian a thawh hnihna atan an nei thung. Tripura East Constituency-ah inthlan thawh hnihna hi neih niin April 18-a neih tura ruahman kha ni mah se tharum thawhna a thlen hlauhthawn avangin nimin khan an inthlang ta zawk a ni. Assam-ah erawh hi chuan nimin khan constituency pali-ah inthlanna an nei thung.
Assam
Assam chuan Gauhati, Kokrajhar, Barpeta leh Dhubri constituency-ah te inthlanna neiin zing dar 7 aṭangin vote thlak ṭan a ni a, polling station 9,577-ah vote thlak a ni. Voter 74,77,062 awmin heng zinga 36,61,570 hi hmeichhia an ni a, 157 chu third gender an ni thung.
Assam constituency pali-ah hian candidate 54 an awm a, Gauhati-ah 17, Dhubri-ah 15, Barpeta-ah 13 leh Kokrajhar-ah pakua an awm a, heng constituency tinah hian BJP leh Congress chu boruak nei lian an ni. Assam-ah hian LS seat 14 awmin April 11 leh April 18 khan seat panga ve veah inthlanna neih a ni tawh bawk. Gauhati hi constituency lian ber a ni a, Prime Minister hlui Manmohan Singh-te nupa pawhin Gauhati constituency-a Dispur-ah vote an thlak.
Nimin tlai dar 3 thleng khan vote 70.41 % a tla hman.
Tripura East parliamentary
Tripura chuan nimin khan venhimna khauh tak hnuaiah LS inthlan thawh hnihna hmachhawnin, section 144 puanna hnuaiah inthlanna hi an nei a ni. Inthlan lai hian Bangladesh ramri khar a nih bakah Assam leh Mizoram nena an inrina pawh khar a ni bawk.
Candidate 10 awmin Communist Party of India-Marxist (CPI-M) sitting MP Jitendra Choudhury, sorkar lai Bharatiya Janata Party candidate Rebati Tripura leh Congress candidate Maharaj Kumari Pragya Deb Barman-te chu boruak nei lian an ni.
Hmun 285-ah polling station 359 a awm a, heng zinga panga hi very sensitive zone niin 138 chu sensitive zone an ni thung. Hmeichhe polling station 30 dah a ni bawk. Voter 2, 90,438 awmin heng zinga 1,47,642 hi mipa an ni a, hmeichhia 1,42,791 an awm thung.
Nimin tlai dar 3 thleng khan vote 67.12 % a tla hman a ni.