Hmarchhak-a pawisa manin record a siam Special Task Force-in chhui zui dawn
Kumin inthlan vuakveta hmarchhaka pawisa man chuan record a break niin Thawhṭanni khan Directorate of Income Tax official-te chuan an sawi a, hmarchhak bank 68-a pawisa tam tham tak tak dahluh leh lakchhuah te chu chhuizui turin Special Task Force (STF)-an din tih an sawi.
Income Tax directorate hian 2014 Lok Sabha inthlan vuakvetah khan hmarchhakah pawisa fai cheng vaibelchhe 1.21 an man tih sawiin, kuminah erawh April 22 thleng khan cheng vaibelchhe 8 an man tawh tih an sawi a ni.
Official-te chuan Directorate in April 22 thlenga pawisa an man tawh hi LS inthlan hmasa vuakveta an man ai khan a let sarih dawnin a tam niin an sawi a, hei hi hmarchhak ni lo hmun dang, tax revenue sang zawk te nena khaikhin pawhin a tam hle tih an sawi.
North East Region (NER) Income Tax Investigation, Principal Director, Sanjay Bahadur chuan hetiang zat pawisa an man theih chhanah hian inthlan atana a hun taka inbuatsaihna kalpui a nih avang niin a sawi. Hemi bakah hian state thuneitute leh police te hmalakna bakah Directorate investigator-ten ground intelligence an lakkhawm ṭhat vang a nih thu a sawi bawk.
District 112-a chhuichianna kalpui turin official 150 vel dah an nih thu leh pawisa fai, khawi aṭanga lo kal nge hriat loh an man te chhui chiang tur Air Intelligence Unit (AIU) 12 an din tih a sawi bawk a ni.
Sanjay Bahadur chuan CEO-te, state police te, CISF , Assam Rifles , CRPF , BSF leh Bank-te chu pawisa manna kawnga an hmalaknaah a fak hle bawk.
STF an din pawh chu Subhrajyoti Bhattacharjee, Additional Director & Nodal Officer chuan a kaihruai dawn tih sawiin AIU-te chu Joint Director, Mrinal Das chuan a kaihruai dawn tih a sawi. Anni hian bank 68-a pawisa tam tham tak tak lakchhuak leh dah luhte chu an chhuichiang dawn tih a sawi a ni.