Hmarchhak bial Inthlan

Assam-ah vote 78.52% tla
Assam chuan Thawhlehni khan Lok Sabha inthlan thawh thumna leh an state tana a hnuhnung ber an nei a, he thu ziah lai thleng hian vote 78.52% a tla niin report chuan a tarlang.

Assam hian Thawhlehni khan constituency pali - Gauhati, Dhubri, Barpeta leh Kokrajhar-ah te inthlanna hi an nei a, polling station 9,577-ah vote thlakna hi neiin zing dar 7:00 aṭangin vote hi an thlak ṭan a ni. Heng constituency pali-ah hian voter 74,77,062 an awm.

Dhubri-ah chuan tlai dar 5:00 thleng khan vote 81.29% a tla hman a, vote tlak ṭhatna ber bial an ni a, hetihlai hian Kokrajhar bial-ah vote tla chhe berin 76.16 % a tla thung. Barpeta-ah 77.65% tla in Gauhati constituency-ah 78.75% a tla a ni.

Inthlanna hi boruak muanawm tak hnuaiah neih niin buaina liantham chhuak report a awm lo. Polling station ṭhenkhatah erawh Electronic Voting Machines (EVM) mumal lo a awm thu tarlan a ni a, he thu ziah lai thleng hi chuan EVM chhia awm zat report Chief Electoral Office chuan an tarlang lo.

Polling official-te chuan dar 5:00 hnulamah pawh inthlanna hi kalpui zui a la nih thu an sawi a, vote thlak tura intlar te chu vote thlak tir vek an nih thu an sawi. Polling station ṭhenkhat chu hmun kilkhawr deuha awm te an nih avangin report kimchang an la dawng lo tih sawi bawkin vote tla zat pawh hi a la pung leh dawn niin an sawi.

Assam Lok Sabha inthlan thawh thumnaah hian candidate 54 an awm a, heng zinga 17 hi Gauhati-a ding niin, Dhubri-ah 15, Barpeta-ah 13 leh Kokrajhar-ah pakua an ding a ni.

Tripura-ah vote 80% tla
Tripura East parliamentary constituency chuan Thawhlehni khan inthlan thawh hnihna neiin voter nuai 12.5 vel awm zinga 80% velin vote an thlak niin election official chuan a sawi.

Official chuan report a la lut kim lo tih sawiin, report zawng zawng an hriat kim hunah chuan vote tla hi 80% a tling ngei dawn tih a sawi. 2014 Lok Sabha inthlanah khan vote 85% a tla tih a sawi bawk. Hetihlai hian polling station 100 velah chuan Electronic Voting Machines (EVM) emaw Voter-Veri­fiable Paper Audit Trail (VVPAT) chian loh vangin vote thlak tihtawp lailawk a nih thu a sawi a ni.

Thawhlehni khan zing dar 7 aṭanga tlai dar 5 thleng inthlanna neih a ni a, polling station 1,645 awmin heng zinga 31 hi hmeichhe polling station a ni. Candidate 10 in Tripura East seat hi an inchuh a ni.

AP: Booth 18-ah inthlang ṭha dawn
Election Commission of India chuan Thawhṭanni khan thuchhuah siamin Arunachal Pradesh-a polling booth 18-ah April 27 hian inthlan ṭhat buatsaih a ni dawn tih a tarlang.

EC chuan April 11-a inthlan neihnaa heng booth-a vote tla te chu an pawm lo tih sawiin, EVM mumal lo leh procedural error dangte avangin inthlan ṭhat hi buatsaih a ngai tih a sawi. Heng booth 18-te hi Kurung Kumey District-a legislative assembly constituency pali hnuaia mi te an nih thu tarlan a ni bawk.

State CEO office pawhin thu­chhuah siam nghalin venhimna hna thawk tur paramilitary force-te pawh dah belh nghal an nih thu a sawi a ni. Arunachal Pradesh hian April 11 khan Lok Sabha inthlan leh state assem­bly inthlan an hmachhawn rual a ni.

Manipur: Polling booth 12-ah inthlang ṭha
Election Commission chuan Inner Manipur parliamentary constituency chhunga polling booth 12-a inthlan ṭhat ngenna chu an pawmpui a, nimin khan inthlan ṭhatna hi an nei.

April 18-a Lok Sabha inthlan thawh hnihna Manipur Inner consti­tuency-a neihah khan assembly constituency pali hnuaia polling booth 12-te chu tihbuai leh tihkaihhlak a nih thu report a awm a ni. EC chuan heng booth 12-a vote tla te chu an pawm lo tih sawiin Chief Electoral Officer PK Singh chuan nimin zing dar 7 aṭanga tlai dar 4 thleng khan inthlan ṭhatna hi neih a ni dawn tih Thawhṭanni khan a sawi.

CEO chuan polling agent-te chu inthlanna dik leh zalen kalpui turin a ngen nghal bawk. Inthlan ṭhatna tur polling booth-ah te hian webcasting leh CCTV coverage, pawnlam leh chhung­ lamah tih vek a ni dawn tih sawiin, police department te chuan venhimna khauh takin an kalpui dawn tih a sawi a ni.

Booth 12 zinga panga hi Chief Minister N Biren Singh-a home constituency Heingang hnuaia awm te an ni a, heng booth-ah hian EVM tihchingpen leh booth capture complaint te a awm.

Inthlan ṭhat neihna tur te hi - Heingang assembly constituency 2/26 Heingang Makha leikai, 2/31 Kairang Muslim Mayai Leikai, 2/23 Heingang Mayai Leikai(A), 2/32 Kairang Muslim Mamang Leikai, 2/33 Kairang Khunou Chingyai Leikai, Thongju Assembly Constituency’s 5/32 Khongman zone-V(B), Andro Assembly Constituency’s 7/32 Yambem (C)Primary School, 7/39 Nungbrang Primary School, Keirao Assembly Constituency’s 6/6 KyamgeiMamang Leikai, 6/20 Urup Muslim, 6/10 Kyamgei Muslim (South-A) leh 6/35 Thiyam Konjil High School (South Wing)-te an ni.

April 18-a inthlanna neihah khan Imphal East district-a Kiyamgei Muslim awmnaa polling station pahnihah buaina a chhuak a, station pakhat zawkah phei chuan EVM leh VVPAT-te pawh tihchhiat a ni hial. Manipur-ah hian Parliamentary seat pahnih a awm a, seat pakhat zawk Outer Manipur Constituency-ah chuan April 11 khan inthlanna an nei a ni.