Nagaland Dy. CM MCC bawhchhiaah puh Riphyim booth-ah inthlang ṭha mai thei
April 11-a inthlanna neih a nih ṭuma Nagaland Deputy Chief Minister Y Patton-a'n Model Code of Conduct a bawhchhia nia puh a nih chungchangah Election Commission of India (ECI) chuan Wokha district-a 37 Tyui Assembly constituency (AC) hnuaia polling station no. 31 Riphyim Old-III-ah inthlan an buatsaih ṭha mai thei nia tarlan a ni.
Nagaland Chief Electoral Officer Abhijit Sinha chuan Riphyim booth-ah hian ECI chuan inthlan ṭhat buatsaih an tum tih sawiin, hma lak mek a nih thu leh thutlukna erawh hriattir an la nih loh thu a sawi. Nagaland Pradesh Congress Committee (NPCC) chuan Lok Sabha inthlan thawh khatna, April 11-a neih a nih ṭum khan Patton chu MCC bawhchhiaah puhin CEO hnenah complaint an thehlut a, inthlan ṭhat an ngiat thu an sawi bawk.
NPCC chuan Patton hi voter slip pasarih/pariat vel nen polling station-ah lutin EVM-ah vote a thlak tih an sawi a, hei hi camera pawhin a la fuh niin an sawi. April 14 khan Wokha Police station-ah Dy. CM lakah hian FIR an thehlut a ni.
NPCC chuan Thawhlehnia thuchhuah an siamah camera aṭanga a lan angin Dy. CM hian vawikhat aia tam vote thlakin pawi a khawih tih an sawi a, a office pawh luah zui tlaka an ngaih loh thu an sawi. Congress chuan Patton chu a office tizahawm loah puhin inhnukhniam turin an ti bawk. A chet dan chu a zahpuiawm hle niin an sawi a ni.