Assam-ah mi 400 dah hrang
Assam-ah mi 400 vel chu Bhutan aṭanga rawn kal, America khualzin , Covid-19 kai tih finfiah nena an intlawh pawh avangin an dinhmun enfiah tura dah hran an ni tih health minister Himanta Biswa Sarma chuan a sawi.
Sarma chuan Assam-ah mi panga chu an sample laka enfiah tawh niin, an result pawh hriat a ni tawh a, heng mite hian Covid-19 hi an kai lo tih finfiah a ni tih a sawi bawk. Tun hnaiah Bhutan rama American tourist, kum 76 mi chu Covid-19 a kai tih hriatchhuah a ni.
He khualzin hi Bhutan a pan hmain Assam-ah a zin kual tih hriat a nih avangin, Assam-a a awm chhunga a mi hmuh leh kawmte zawnchhuah an ni. Minister chuan he khualzin chuan an MV Mahabahu lawng leh a thlenna resort-a awmte chu zawnchhuah niin dah hran an ni a, heng mite hi doctor leh microbiologist-te chuan uluk takin an dinhmun an enfiah mek a ni, a ti.
Kar liam ta Inrinni khan health and family welfare minister Pijush Hazarika chuan MV Mahababu lawng hi Jorhat-a Neamatighat lawngchawlh hmunah din tir a ni tih a lo sawi tawh bawk. American khualzin thlenna hotel pawh damdawi hmanga tihthianghlim vek a ni tawh bawk a ni.
Sarma chuan health department chuan hri leng mek laka invenna turin theihtawp a chhuah mek tih a sawi. Mi eng emaw zat dah hran an nih avanga chiai phah lo turin mipuite a ngen a, Covid-19 vei American khualzin zinpui ngei pawh chu enfiah a nih hnua he hri hi a kai ve lo tih pawh hriatchian a ni tawh tih a sawi.