Moreh leh ICP-ah isolation ward siam

Coronavirus hri leng mek avanga Myanmar ramri bul, Manipur-a Moreh khuaa hospital leh Integrated Check Post (ICP)-a isolation ward siamte chu Pathanni khan hawn an ni.

 

Manipur health minister L Jayentakumar chuan an state-ah Covid-19 vei hi an la awm lo tih sawiin, WHO report tihchhuah thar berah pawh Myanmar-ah a vei hi hriat an la awm lo a ni, a ti. Mahse hemi rual hian an state-a hri leng hi a luh lohna turin theihtawpa fimkhur a ngai tih a sawi. Mipuite chu punkhawmna hmunte pumpelh tura ngenin, taksa chakna tura chaw leh ei tur dangte ei ṭha tur te, kut sil taima tur leh, faina lam ngai pawimawh turin a chah. Social media-ah report dik lo tak tak thehdarh a ni ṭhin chu pawi a tih thu leh, official information lo chu ring lo turin mipuite a chah bawk.