Tripura: Darkar 72 chhungin kawng km 127-a thui siam tum

Tripura chief minister Biplab Kumar Deb chuan Pathianni khan darkar 72 chhung thingtlang kawng, km 127-a thui siamna tur project a hawng. 

He project hnuaiah hian West Tripura district chhunga thing­tlang khaw kilkhawr zawkah kawngpui hi siam tum a ni. CM chuan, "Lung phahin kawngpui km 127-a thui chu ni thum chhungin siam zawh a ni ang. He mission hnuaiah hian kawng siamna tur atan hian MGNREGA hnuaiah mi nuai 1.50 ten an thawk dawn a ni," a ti. Tripura-ah chuan kawngpuiin a tlawhpawh loh thingtlang khaw te zual eng emaw zat an la awm tih sawiin, CM chuan state sorkar kawng siam hna hi West Tripura district-ah bul ṭanin, district dangah pawh he mission hnuaiah hian kalpui chhunzawm a ni dawn tih a sawi. 

Deb chuan BJP-IPFT ṭang­rual sorkar chuan Tripura chu model state-a siam a tum tih sawiin, thingtlang khaw tinte chu kawngpui tha ṭaka pawhtir vek a, hmasawnna thlen tir a tum a ni, a ti. National Highway project hnuaiah Tripura-ah chuan kawngpui siam hna, cheng vaibelchhe 8,600 hu kalpui a ni dawn a, heng zinga cheng vaibelchhe 1,200 chu kum khata ruahman niin, tender pawh koh a ni tawh tih CM chuan a sawi. Sorkar chuan kawngpui enkawlna tur te, infrastructure tihchangtlunna tur, waterways connecitivy, Agartala Smart City Mission leh Feni bride project-te a kalpui mek a ni.