IPFT in tiamchin awm loin kawngpui dang BJP nen an thawhdunna ngaihtuah ṭha dawn

Tripura-a sorkarna siam mek Bharatiya Janata Party (BJP) thawhpui Indigenous People's Front of Tripura (IPFT) chuan tiam chin awm loin Gandacherra-Ambassa leh Gandahera-Raisyabari kawngpui an dang.

IPFT hian IPFT member pahnih leh Congress member pakhat April 23-a Raima Valley constituency-a polling booth pakhata vote thlak tur dan an nih duh lohna lantir nan kawngpui hi an dang a ni. IPFT chuan he thila inhnamhnawih mi pali-te chu man ngei an phut tih a sawi.

IPFT central committee chuan emergency meeting an nei dawn nia tarlan a ni a, meeting-ah hian BJP chu an thawhpui zel dawn nge dawn lo an sawiho dawn nia sawi a ni bawk.

Thawhlehni aṭang khan IPFT hian kawngpui pahnih hi an dang a, police-te chuan kawng an dan chu sut turin ngen mah se an sut duh lo a ni.

April 23-a Tripura Lok Sabha inthlan thawh hnihna, Tripura East (ST) seat-a neihah khan BJP worker-te chuan IPFT polling agent pahnih - Hemendra Reang, Natunjay Chakma leh Congress polling agent Iparam Reng-te chu Raima Valley (44) assembly segment-a booth no-51 aṭang­in an nawrchhuak lui a, mi ṭhenkhat chuan kut te an thlak nia sawi a ni bawk.

April 18 khan Tripura East constituency-ah hian inthlan thawh hnihna neih tura ruahman a ni a, mahse tharum thawh leh buaina chhuah hlauhthawn thilah April 23 khan inthlanna hi an nei ta zawk a ni.